KLM áýe kompanııasy BAÁ men Saýd Arabııasyna barlyq reısterdi toqtatty
ASTANA. KAZINFORM — Nıderlandynyń KLM áýe kompanııasy Taıaý Shyǵystaǵy shıelenisterge baılanysty Dýbaıǵa, sondaı-aq Saýd Arabııasynyń Er-Rııad pen Dammam qalalaryna 17 mamyrǵa deıin barlyq reısterdi toqtatty.
Tasymaldaýshynyń málimdemesinde atap ótilgendeı, sheshim óńirdegi qalyptasqan jaǵdaıǵa baılanysty qabyldanǵan.
— Jolaýshylar men ekıpajdyń qaýipsizdigi árqashan bizdiń birinshi kezektegi mindetimiz. Biz bul sheshimniń saıahatshylarymyzǵa aıtarlyqtaı áser etetinin túsinemiz jáne biz olardy habardar etý úshin qoldan kelgenniń bárin jasaımyz, — delingen málimdemede.
Toqtatylǵan reısterdegi jolaýshylarǵa jeke habarlanady. Olarǵa áýe kompanııasynyń resmı saıty arqyly sapar kúnderin ózgertý nemese aqshany qaıtarýdy suraý múmkindigi usynylady.
KLM kompanııasy jaǵdaıdy muqııat baqylaýdy jalǵastyratynyn jáne tıisti organdarmen baılanysta ekenin qosty.
Buǵan deıin álemdik áýe tasymaldaýshylary Iran tóńiregindegi qaqtyǵys aıasynda avıaotyn baǵasynyń kúrt ósýinen zardap shege bastaǵany týraly jazdyq. Bul jaǵdaı áýe bıletteriniń qymbattaýyna, baǵyttardyń qysqarýyna jáne reıs kestesiniń buzylýyna ákelip soqty.
Iranǵa qarsy soqqylar bastalǵannan beri avıatsııalyq janarmaı baǵasy Eýropada eki esege, al Azııada 80 paıyzǵa ósti. Otyn avıakompanııalar úshin jumystan keıingi ekinshi úlken shyǵyn bolyp qala beredi, ol operatsııalyq shyǵyndardyń tórtten bir bóligin quraıdy.
Esterińizge sala keteıik, 28 aqpanda AQSh pen Izraıl Iranǵa qarsy operatsııa bastaǵan bolatyn. Aq úı Irannan zymyrandyq jáne ıadrolyq qaýip tónip turǵanyn jarııalady.
