Klızmadan kúıip qalǵan bala: Aýrýhana basshysyna aıyppul salynyp, medbıke jumystan qýyldy
«Jospardan tys tekseris barysynda mynadaı kemshilikter anyqtaldy: tıisti ruqsaty joq ınfektsıonıst-dáriger klınıkalyq qyzmet kórsetken, protsedýrany tájirıbesiz medbıke jasaǵandyqtan, klızma jasaý tártibi buzylǵan. Al aýrýhananyń jaýapty qyzmetkerleri medıtsınalyq protsedýranyń durys atqarylýyn qadaǵalamaǵan. Atalǵan fakti boıynsha 2 medbıke jumystan shyǵaryldy, bas medbıke qyzmetinen alyndy, bas dárigerdiń orynbasary men emdeýshi dárigerge qatań sógis jarııalandy» delingen habarlamada.
Budan bólek, Shymkenttegi qalalyq ınfektsııalyq aýrýhananyń bas dárigerine ákimshilik jaza retinde 45 AEK kóleminde aıyppul salyndy. Sondaı-aq, tekseristiń qorytyndysy boıynsha materıaldar protsessýaldyq sheshim shyǵarý úshin quqyq qorǵaý organdaryna jiberiledi.
«Búginde 10 aılyq náreste sanıtarlyq avıatsııa kómegimen Almaty qalasyndaǵy Pedıatrııa jáne balalar hırýrgııasy ǵylymı ortalyǵyna jetkizilgen. Qazir balanyń jaǵdaıy aýyr emes, turaqty. Oń jaq jambasy men tikisheginiń kúıgeni anyqtaldy. Balaǵa rektoskopııa jasaý kezinde tikishektiń shyryshty qabatynyń kúıgeni baıqalady. Biraq, qansyraý men nekroz belgileri joq. Tikishektiń basqa bóligi ózgermegen. Bala konservatıvti em qabyldaýda. Mamandardyń aıtýynsha, naýqastyń eminde oń nátıje baıqalady» dep málim etti komıtetten.
Eske sala keteıik, oqıǵa 28 naýryz kúni bolǵan. Aýrýhana medbıkesi klızma jasaý kezinde sýdyń temperatýrasyn teksermegen. Ol temperatýra 36 gradýs bolý kerek bolsa, balaǵa 50-60 gradýs ystyq sýmen jasalǵan. Saldarynan balany termııalyq kúıik shalǵan. On aılyq sábıdiń kúıip qalýyna sebepker bolǵan 2 medbıke men aǵa medbıke tergeý aıaqtalǵanǵa deıin jumystan shettetildi. Sondaı-aq, densaýlyq saqtaý mınıstri Eljan Birtanov atalǵan jaǵdaıǵa qatysty pikir bildirdi.
Aıta keteıik, búginde balanyń jaǵdaıy densaýlyq saqtaý mınıstrliginiń udaıy baqylaýynda.