Klınıkalar eki jastan bastap balanyń jynysyn ózgertedi – feık

ASTANA. QazAqparat – Instagram-da eki jastan asqan balalarǵa jynysyn aýystyrý operatsııasyn jasaýǵa daıyn klınıkalar bar ekendigi týraly aqparat jarııalandy. Onda mundaı jaǵdaıǵa balanyń oıynshyq tańdaýy jáne minez-qulqy sebep bolýy múmkin ekeni aıtylǵan. Bul aqparat shyndyqqa janaspaıdy dep habarlaıdy, QazAqparat stopfake.kz-ke silteme jasap.

Habarlamaǵa sáıkes, AQSh-taǵy klınıkalar, mysaly, eki jasar qyz qýyrshaq emes, mashınalarmen oınaıtyn bolsa nemese er bala oǵan tán emes oıynshyqtardy tańdasa, balanyń jynysyn ózgertedi. Postta eki jastan tórt jasqa deıingi balalarǵa ota jasaýǵa daıyn eki mekeme atalady: Dıýk klınıkasy jáne Soltústik Karolına ýnıversıtetiniń klınıkasy. Sondaı-aq ECU Health klınıkalar jelisi de kórsetilgen. Atalǵan aýrýhanalardyń barlyǵy Soltústik Karolınada ornalasqan, sáıkesinshe osy shtattyń zańdaryna baǵynady. Oǵan sáıkes, 18 jasqa tolmaǵan adamdarǵa jynysyn aýystyrý boıynsha operatsııa jasalmaıdy.

Dıýk klınıkasynyń saıtynda da dál osylaı jazylǵan. Klınıkada genderlik dısforııasy bar 18 jasqa deıingi balalarǵa hırýrgııalyq aralasýdy qajet etpeıtin konsýltatsııalyq jáne basqa da kómek kórsetiledi.

Soltústik Karolına ýnıversıtetiniń klınıkasynyń saıttarynda jáne ECU Health klınıkalar jelisinde balalardyń jynysyn aýystyrý operatsııalary týraly aqparat joq.

Buǵan deıin Associated Press portalynyń faktchekerleri Soltústik Karolınada eki jasar balalardyń jynysyn ózgertýge daıyn klınıkalar bar degen habarlamalardy joqqa shyǵarǵan.

Demek, taralǵan aqparat shyndyqqa janaspaıdy.