Klımttiń «Jelpýishti hanym» kartınasy 86 mıllıon eýroǵa satylyp, rekord jańartty

ASTANA.QazAqparat – Gýstav Klımttiń «Jelpýishti hanym» dep atalatyn kartınasy aýktsıonda 86 mıllıon eýroǵa satylyp, Eýropadaǵy eń qymbat kartına retinde rekord jańartty, dep habarlaıdy QazAqparat Euronews-ke silteme jasap.

Usynystar birinen soń biri shıelenisti sońyna deıin saqtaı otyryp, bas aınaldyrar jyldamdyqpen júrdi. Sońǵy 29 jyl ishinde bir otbasynyń qolynda bolǵan sýretti kim satyp alǵany áli belgisiz.

«Jelpýishti hanym» - Klımttiń eń úzdik ári sońǵy portreti. Ol ony 1917-1918 jyldary, 55 jasynda qaıtys bolar aldynda salǵan.

Buǵan deıin Eýropa aýktsıonyndaǵy eń qymbat óner týyndysy 65 mıllıon fýnt sterlıngke (76 mıllıon eýro) satylǵan Alberto Djakomettıdiń qola músini «Jaıaý adam I» bolǵan.