Klımattyń ózgerýi sý jáne azyq-túlik qaýipsizdigimizge qaýip tóndiredi – Myrzaǵalıev

NUR-SULTAN. QazAqparat – Klımattyń ózgerýi sý jáne azyq-túlik qaýipsizdigimizge qaýip tóndiredi. Bul týraly QR Ekologııa, geologııa jáne tabıǵı resýrstar mınıstri Maǵzum Myrzaǵalıev «ECOJER» halyqaralyq kongresinde aıtty, dep habarlaıdy QazAqparat tilshisi.

«Respýblıkamyz Táýelsizdiginiń 30 jyldyǵyn merekeleý aıasynda ótip jatqan «Bolashaqtyń baǵdary – turaqtylyq» halyqaralyq kongresinde sizderdi Qazaqstan Respýblıkasy Ekologııa, geologııa jáne tabıǵı resýrstar mınıstrliginiń atynan quttyqtaýǵa ruqsat etińizder. Aıta keterligi, bul is-shara Dúnıejúzilik qorshaǵan orta kúni qarsańynda ótkizilip jatyr. Qazirgi ýaqytta turaqty damý máseleleri álemdik kún tártibiniń mańyzdy bóligi bolýda. Biz klımattyń qalaı ystyq bolyp jatqanyn, sýdyń azaıa bastaǵanyn jáne muzdyqtardyń shegingenin baıqaımyz. Klımattyń ózgerýi bizdiń sý jáne azyq-túlik qaýipsizdigimizge qaýip tóndiredi», - dedi mınıstr.

Onyń atap ótýinshe, Qazaqstannyń gúldenýi men ál-aýqaty osyǵan baılanysty ekenin túsine otyryp, el basshylyǵy klımattyń ózgerýi máselelerine erekshe nazar aýdarýda.

«Tuńǵysh Prezıdent - Elbasy Nursultan Nazarbaev pen Memleket basshysy Qasym-Jomart Toqaev túrli halyqaralyq alańdarda klımat máselelerin birneshe ret kóterdi. Sonyń bir mysaly – «Jasyl kópir» seriktestik baǵdarlamasy, «jasyl» ekonomıka boıynsha tujyrymdamany qabyldaý, Parıj kelisimin ratıfıkatsııalaý jáne taǵy basqalar», - dedi Maǵzum Myrzaǵalıev.