Klımattyń ózgerýi elimizdiń aýyl sharýashylǵy sektoryna qalaı áser etedi
ASTANA. QazAqparat – Qazaqstandaǵy aýyl sharýashylyǵy ınfraqurylymynyń 80 paıyzdan astamy eskirgen. Mundaı derek ashyq talqyǵa shyǵarylǵan Qazaqstannyń 2060 jylǵa deıin kómirtegi beıtaraptyǵyna qol jetkizý týraly strategııasynyń qujatynda keltirilgen, dep habarlaıdy QazAqparat tilshisi.
«Aýyl sharýashylyǵy sektory klımattyń yqpalyna beıim. Klımattyń ózgerýi Qazaqstandaǵy jaýyn-shashyn men bıomdardyń qurylymyna yqpal etedi, ekstremaldy aýa raıy qubylystarynyń jıiligi men qarqyndylyǵy artady, ortasha temperatýra joǵarylaıdy jáne sýarýǵa arnalǵan sýdyń qoljetimdiligi tómendeıdi. Qazirgi ýaqytta aýyl sharýashylyǵyna ulttyq sý tutynýdyń 3/2 tıesili. Klımattyń ózgerýi kóptegen daqyldardyń jáne barlyq derlik aımaqtardyń ónimdiliginiń ósýine teris áser etýi múmkin.
Aýyl sharýashylyǵyn damytý basty basymdyqtardyń biri sanalady. Óıtkeni, ol jumyspen qamtýda, ásirese aýyldyq jerlerde, sondaı-aq áleýmettik jáne azyq-túlik qaýipsizdigine baılanysty mańyzdy ról atqarady. Alaıda, qarjylandyrýǵa qoljetimdiliktiń shekteýli bolýy kóptegen fermerlerge ónimdi jáne turaqty aýylsharýashylyq sektoryn damytýǵa kedergi keltiredi. Aýyl sharýashylyǵy ınfraqurylymynyń 80%-dan astamy eskirgen. Qazirgi ýaqytta Qazaqstandaǵy aýyl sharýashylyǵy jerleriniń tek 1%-y ǵana organıkalyq aýyl sharýashylyǵyna bólinedi», - dep kórsetilgen qujatta.
El Úkimeti usynǵan Strategııa qujatynda atalǵan máselelerdi sheshýdiń birneshe joly kórsetilgen. Onyń biri – aýylsharýashylyq qaldyqtarynan bıoenergııa óndirý áleýetin barynsha paıdalaný. Tıisinshe bıogazdy jylý jáne elektr energııasyn óndirýde qoldaný josparlanyp otyr. Onyń nátıjesinde aýaǵa bólinetin parnıktik gaz qaldyqtarynyń kólemi azaıady. Sonymen qosa, egin sharýashylyǵyn damytýda klımattyń ózgerýine tez beıimdeletin daqyldardy engizý kózdeledi.
Toqtala ketsek, bekitilýi múmkin Strategııanyń maqsaty – tıimdi ári tómen kómirtekti damý modelin qurý, balama kózderdi engizý. Atap aıtqanda, qazba energııa resýrstaryn jaǵý kólemin azaıtyp, tıisinshe tıimdi tehnologııalardy qoldaný. Ol úshin qalalar men óńirlerge jáne túrli bıznes salalaryn qosa alǵanda, ekonomıkaǵa jasyl ınvestıtsııalardy tartý josparlanǵan. Qujatta kórsetilgendeı, atalǵan jumystardy kezeń-kezeńimen oryndaı otyryp, elimiz 2030 jylǵa qaraı aýaǵa bólinetin parnıktik gaz qaldyqtaryn 15 paıyzǵa tómendetedi. Al 2060 jylǵa deıin kómirtegi beıtaraptyǵyna qol jetkizedi.
https://legalacts.egov.kz/npa/view?id=14311815
