Klımattyń ózgerýin elemeýdi jalǵastyra almaımyz — EO ókili
ASTANA. KAZINFORM — Ortalyq Azııa óńiri Eýropalyq odaq úshin turaqty ári senimdi seriktes bolyp qalýda. Bul týraly Óńirlik ekologııalyq sammıt aıasynda ótip jatqan Ortalyq Azııa klımattyń ózgerý máseleleri jónindegi konferentsııada Eýropalyq Odaqtyń Qazaqstandaǵy ókildigi yntymaqtastyq bóliminiń basshysy Iohannes Baýr aıtty.
— Ókinishke oraı, búginde álem óte kúrdeli daǵdaryspen betpe-bet kelip otyr. Geosaıası turǵydan asa qıyn jaǵdaıdamyz. Ýkraınadaǵy soǵys jalǵasýda, al Taıaý Shyǵys ta jekelegen memleketterdiń áreketi saldarynan zardap shegip jatyr. Biz dál ortasynda turmyz. Osy oraıda Ortalyq Azııa óńiriniń turaqty ári senimdi seriktes bolyp qalyp otyrǵanyn atap ótý óte mańyzdy. Osyndaı jaǵdaıda Eýropalyq odaq qazba otyn naryqtarynyń qubylmalylyǵyna moıynsunyp otyra almaıdy. Bizge alǵa jyljý úshin energııa táýelsizdigi men ártaraptandyrý qajet, bul — strategııalyq ımperatıv. Bul tek klımat turǵysynan ǵana emes, ekonomıkalyq jáne qaýipsizdik turǵysynan da asa mańyzdy, — dedi Eýropalyq odaq ókili.
Onyń aıtýynsha, taza energııany damytý, elektrlendirýdi ilgeriletý, jańǵyrtylǵan marshrýttardy engizý jáne energııa tıimdiligin arttyrý baǵytyndaǵy kúsh-jigerdi kúsheıtý qajet. Sonymen birge klımattyń ózgerýiniń áserin tómendetip baǵalaýǵa bolmaıdy. Óıtkeni álem jylynýyn jalǵastyrýda. Eýropada jylyný qarqyny basqa óńirlerge qaraǵanda eki ese jyldam júrip jatyr.
— Al Ortalyq Azııaǵa keler bolsaq, bul óńir klımattyń ózgerýine baılanysty eleýli máselelerge tap bolyp otyr. Bul ekonomıkalyq shyǵyndardyń artýyna, orman órtteriniń kóbeıýine, sý tasqyndarynyń jıileýine jáne qoǵamǵa teris áserdiń kúsheıýine alyp keledi. Eger shuǵyl sharalar qabyldanbasa, 2030 jylǵa qaraı álemde sý resýrstarynyń jahandyq tapshylyǵy 40 paıyzǵa jetýi múmkin. Al Ortalyq Azııa bul turǵyda eń osal óńir sanalady. Sondyqtan geosaıası daǵdarysqa qaramastan, biz klımattyń ózgerýin elemeýdi jalǵastyrýǵa jol bere almaımyz. Eýropalyq odaq seriktesterin klımattyq saıasatta batylyraq bolýǵa jáne 2030 jylǵa qaraı jańartylatyn energııa kózderiniń úlesin úsh esege arttyrý, sondaı-aq jyl saıynǵy energııa tıimdiligin eki esege ósirý sııaqty jahandyq maqsattardy biriktirýge shaqyrady, — dedi Iohannes Baýr.
Aıta keteıik, Óńirlik ekologııalyq sammıttiń ashylýyna Memleket basshysy Qasym-Jomart qatysýshylarǵa iltıpat bildirip, halyqaralyq dıalog alańynyń mańyzyna toqtalǵan edi.