Kaspıı teńizine qaýip tónip tur - Memleket basshysy
BAKÝ. KAZINFORM - Qazaqstan Prezıdenti Bakýdegi Dúnıejúzilik klımat sammıtinde sóılegen sózinde aýyl sharýashylyǵyn turaqty damytýǵa kóshý mańyzdy ekenin jetkizdi, dep habarlaıdy Aqorda.
Qazaqstan «kómirtekti eginshilikke», ıaǵnı aýaǵa taralatyn parnıktik gazdardyń mólsherin azaıtý jáne topyraqty qunarlandyrý arqyly aýyl sharýashylyǵyn júrgizý ádisterin engizýge qaı jaǵynan da qolaıly memleket. Buǵan elimizdegi aýyl sharýashylyǵyna jaramdy 200 mıllıon gektar jer múmkindik beredi. Prezıdent qyzyǵýshylyq tanytqan taraptardy Qazaqstannyń osy saladaǵy áleýetin zertteýge shaqyrdy.
– Elimiz álemdik ýran jetkizý isiniń 43 paıyzyn qamtamasyz etedi jáne kómirtegi mólsheri tómen qýat kózi sanalatyn ıadrolyq energetıkany damytýda mańyzdy ról atqarady. Bıyl qazan aıynda ótken jalpyulttyq referendýmda halqymyzdyń basym bóligi Qazaqstanda atom elektr stantsııasyn salýdy qoldady. Biz osy saladaǵy jetekshi tehnologııalyq alpaýyttarmen seriktese otyryp, atalǵan jobanyń qaýipsizdigi men tıimdiligin qamtamasyz etýge umtylamyz, – dedi Memleket basshysy.
Qasym-Jomart Toqaev dúnıe júzindegi sý resýrstaryna qatysty problemaǵa toqtaldy.
– Klımattyń ózgerýi jahandyq sý tsıkline áser etip otyr. Álemdegi tabıǵat apattarynyń 80 paıyzdan astamy sý tóńireginde oryn alady. Bıyl bizdiń elimiz buryn-sońdy bolmaǵan alapat sý tasqynymen betpe-bet keldi. Keleshekte osyndaı tótenshe jaǵdaılar kezinde jedel áreket etip, odan keıingi qaıta qalpyna keltirý jumystaryn tez atqarý úshin qaýip-qaterdi basqarýdyń keshendi júıesin engizemiz. Sý máselesine jahan nazaryn aýdarý maqsatynda bıyl jeltoqsan aıynda Frantsııamen birlesip One Water sammıtin ótkizemiz. Forýmǵa qatysýshylar sý resýrstaryn jahandyq deńgeıde basqarý máselelerin talqylaıdy. Búginde Kaspıı teńizine qaýip tónip tur. Álemdegi eń úlken kóldi qutqarý – barshaǵa ortaq mindet ári bul uzaqmerzimdi halyqaralyq yntymaqtastyqty talap etedi. Osy oraıda Prezıdent Ilham Álıevtiń Kaspıı mańy memleketteriniń sarapshylar tobyn qurý týraly usynysyn qoldaımyz. Sonymen qatar Qazaqstan Aral teńizin qutqarý úshin naqty sharalar qabyldap jatyr, – dedi Prezıdent.
Qasym-Jomart Toqaev sózin qorytyndylaı kele, Ázerbaıjannyń SOP29-ǵa tabysty tóraǵalyq etkeni jáne sammıtti joǵary deńgeıde uıymdastyrǵany úshin Prezıdent Ilham Álıevke rızashylyq bildirdi. Memleket basshysy ádil, ınklıýzıvti ári ashyq klımattyq kún tártibin qalyptastyrýda Qazaqstannyń halyqaralyq seriktestermen yqpaldastyqty odan ári nyǵaıtýǵa daıyn ekenin jetkizdi.
Sammıtte 80-nen astam memlekettiń basshylary, halyqaralyq jáne óńirlik uıymdardyń jetekshileri sóz sóıleıdi dep josparlanyp otyr.
Aıta keteıik, keshe Memleket basshysy Bakýge jumys saparymen bardy. Búgin Qasym-Jomart Toqaev Dúnıejúzilik klımat sammıtine qatysý úshin Baký olımpıadalyq stadıonyn aralady.
