Klımattyń ózgerýi saldarynan Germanııada ońtústik jylandary kóbeıip barady
ASTANA. KAZINFORM – Klımattyń ózgerýine baılanysty Germanııada buryn tek Ońtústik Eýropada mekendegen jylan túrleri jıi kezdesip júr. Keıbiriniń uzyndyǵy 2 metrden asady, dep habarlaıdy DW.
Mıýnhendegi Baýyrymen jorǵalaýshylardy qutqarý ortalyǵynyń jetekshisi Markýs Baýrdyń aıtýynsha, sońǵy bes jylda Bavarııa jerinde tórtjolaqty poloz keminde 15 ret baıqalǵan. Buryn bul ýly emes jylan negizinen Balqan túbegi men Grekııada ǵana tirshilik etken. Onyń uzyndyǵy 2 metrden asady.
Sondaı-aq Bavarııada Jerorta teńizi aımaǵyna tán ýly emes taǵy bir túr – gadıýka tárizdi sý jylany birneshe márte kezdesken.
Al Reınland-Pfalts federaldyq jerindegi Tsvaıbrıýkken mańynda Ońtústik Eýropadan taralǵan sary-jasyl poloz on jyldan beri mekendep keledi. Qazirgi ýaqytta onyń sany birneshe júz basqa jetken.
– Bul jylandardyń bir bóligi klımattyń ózgerýine baılanysty tabıǵı jolmen Germanııaǵa qonys aýdarǵan bolýy múmkin. Óıtkeni olardyń dástúrli mekendeý ortasy barǵan saıyn tarylyp keledi. Al keıbiri adamdardyń kómegimen kezdeısoq jetkizilgen. Máselen, bir jylan Italııadan Mıýnhenge avtokóliktiń astyńǵy bóligine jabysyp kelgen jaǵdaı tirkelgen, – dedi Markýs Baýr.
Ǵalymdardyń aıtýynsha, atalǵan jylandar adam úshin qaýipti emes. Alaıda olar jergilikti ekojúıege áser etýi múmkin. Mysaly, Tsvaıbrıýkken mańynda sary-jasyl polozdardyń kóbeıýi olardyń negizgi qoregi sanalatyn kesirtkelerdiń jergilikti popýlıatsııasyn edáýir azaıtqan.
Sonymen qatar bul jylandar eginge zııan keltirip, túrli aýrý taratatyn tyshqandarmen de qorektenedi.
Aıta keteıik, Germanııada jylandardyń jergilikti jeti túri mekendeıdi jáne olardyń barlyǵy belgili bir deńgeıde joıylyp ketý qaýpinde tur. Sondyqtan tabıǵat aıasynda olardy kezdestirý áli de sırek qubylys sanalady.
Buǵan deıin Ońtústik Qytaıda jylannyń jańa túri tabylǵany habarlandy.
