Klımattyń ózgerýi mıgratsııaǵa qalaı áser etedi — sarapshy pikiri
ASTANA. KAZINFORM — Aldaǵy ondaǵan jylda klımattyń ózgerýine baılanysty Qazaqstan men Ortalyq Azııaǵa aǵylatyn mıgranttar sany artýy múmkin. Bul týraly QR Prezıdenti janyndaǵy Qazaqstannyń strategııalyq zertteýler ınstıtýty Ekonomıkalyq saıasatty taldaý bóliminiń basshysy Anna Alshanskaıa málimdedi.
Ol QR Prezıdentiniń «Joǵary bilikti mamandardy, sheteldik ınvestorlardy jáne kásipkerlerdi tartý úshin qolaıly jaǵdaılar jasaý maqsatynda kóshi-qon saıasatyn jetildirý jónindegi sharalar týraly» Jarlyǵyn túsindirýge arnalǵan dóńgelek ústelde atalǵan taqyrypqa keńinen toqtaldy.
Sarapshynyń aıtýynsha, Ortalyq Azııada jumys kúshi tapshylyǵyna baılanysty Qazaqstan birtindep aımaqtaǵy eńbek mıgranttaryn tartatyn negizgi ortalyqtardyń birine aınalyp keledi. Elimizge, ásirese, kórshi memleketterden jumys isteýge keletinderdiń sany artyp jatyr.
Sonymen birge, onyń pikirinshe, saıası jáne ekonomıkalyq turaqsyzdyq jappaı ári baqylaýsyz mıgratsııa aǵynyna sebep bolýy múmkin. Sondyqtan memleketter ondaı dúrbeleń kóshi-qonǵa daıyn bolýy qajet.
Odan bólek, mundaı beıbereketsizdikke klımattyń ózgerýi de áser etýi yqtımal. Mysaly, jahandyq jylyný saldarynan sý deńgeıi baıaý nemese kúrt kóterilse, teńiz ne muhıtqa jaqyn turatyn halyq qaýipsiz jer izdep údere kóshetini anyq.
— Qazir klımat mıgratsııanyń basty faktorlarynyń birine aınalyp kele jatyr. Mamandardyń sózinshe, Qazaqstanda aýa raıynyń jylynýy álemdegi ortasha kórsetkishten joǵary qarqynmen júredi. Bul mıgratsııalyq aǵyndardyń ózgerýine yqpal etýi yqtımal. Dúnıejúzilik banktiń esepteýinshe, 2050 jylǵa qaraı Ortalyq Azııaǵa 2 mıllıon «klımattyq mıgrant» qonys aýdarýy múmkin. Mundaı úderiske aldyn ala daıyndalyp, mıgratsııalyq, ekonomıkalyq jáne demografııalyq saıasatta bul jaıttardy eskerý mańyzdy, — dedi Anna Alshanskaıa.
Onyń aıtýynsha, Qazaqstan óz azamattary úshin de, eńbek mıgranttary úshin de múmkindikter ortalyǵy retinde damyp, aımaqtaǵy ornyn kúsheıte bergeni jón.
Aıta keteıik, buǵan deıin Ortalyq Azııa búginde klımattyq ózgeristerdiń dál ortasynda turǵanyn jazǵanbyz.
