Klımattyń ózgerýi máselesi aımaqtyq aýqymda tıimdi sheshilýi kerek - QR Ekologııa mınıstri

ASTANA.KAZINFORM - Bul týraly Erlan Nysanbaev Samarqandta ótip jatqan Ortalyq Azııa jáne Eýroodaq sammıti aıasynda «Jibek Joly» telearnasynyń júrgizýshisi Aınur Imanǵalıǵa málim etti.

– Búgingi tańda óte mańyzdy másele – sýmen qamtamasyz etý máselesi. Qazaqstannyń ońtústigi, jalpy Ózbekstan, Qyrǵyzstan, Tájikstan Syrdarııa arqyly, Ózbekstan da Ámýdarııa arqyly jalǵasyp jatqanyn bilemiz. Biz Syrdarııa ózeniniń sý resýrstaryn birlesip basqarý júıesin qurýdamyz, - dedi mınıstr.

Erlan Nysanbaev klımattyń ózgerýi máseleleri bir eldiń emes, tutas óńir aýqymynda tıimdi sheshilýi kerektigin atap ótti.

– Bizde negizinen shól jáne shóleıt aımaqtar ekenin eskersek, temperatýranyń kóterilý protsesteri biz úshin uqsas. Sońǵy 70 jylda bizdegi aýa temperatýrasy 1,5-2 gradýsqa kóterilgeni anyqtaldy. Aldaǵy 50-60 jylda taǵy 2-3 gradýsqa artady degen boljam bar. Sondyqtan búgin kóp másele boıynsha áreketimizdi salystyryp, bir jerde yntymaqtasý mańyzdy, - dep qosty ol.

Buǵan deıin Memleket basshysy «Ortalyq Azııa-Eýropa Odaǵy» sammıtinde sóılegen sózinde Qazaqstan dúnıejúzindegi ıadrolyq otynnyń 40 paıyzǵa jýyǵyn qamtamasyz etip otyrǵany jaıly aıtqanyn jazǵan edik.