Klımatologtar: Reseıde 50 jyldyń ishinde 8 óńir sý astyna ketedi
ASTANA. QazAqparat - Aldaǵy 50 jylda Reseıdiń segiz óńiri tolyqtaı sý astynda qalady. RF Oral federaldy ýnıversıteti (OrFÝ) Klımat fızıkasy men qorshaǵan orta zerthanasynyń ǵalymdary Reseı ǵylym akademııasy, Frantsııa, Germanııa men Japonııa ınstıtýttaryndaǵy áriptesterimen birlesip osyndaı boljam jasady.
Klımatologtardyń pikirinshe, jahandyq jylymyq saldarynan máńgilik muzdar erı bastaıdy. Sý basý qaýpiniń aldynda turǵan aımaqtarǵa Qıyr Soltústiktegi: Arhangelsk pen Mýrmansk oblystary, ıAmalo-Nenetsk okrýgi, Krasnoıarsk ólkesi, ıAkýtııa jáne Komı Respýblıkasy kiredi.
«Túrli halyqaralyq stansalardaǵy baqylaý deregi boıynsha, máńgilik muz basqan Arktıkadaǵy muz qabatynyń temperatýrasy sońǵy 50 jylda qatty ózgeriske ushyraǵan. Buryn -10 gradýs shamasynda bolsa, 2015 jyldan bastap -5 gradýsqa tómendegen. +1 gradýsqa jetken ýaqytta muz qabaty erip, barlyǵy opyrylady. 50 jyldan keıin apatqa dýshar bolamyz. Odan da tez oryn alýy múmkin, sebebi qazir barlyq úderister joǵary qarqynmen órleý ústinde», - dep túsindirdi OrFÝ Klımat fızıkasy men qorshaǵan orta zerthanasynyń meńgerýshisi Vıacheslav Zaharov.
Onyń aıtýynsha, Batys Sibir aýmaǵynda muz qabaty juqara bastaǵan. «ıAmaladaǵy barlyq qalalardy: Salehard, Novyı Ýrengoı, Labytnangılerdi sý basady. Sáıkesinshe, barlyq munaı-gaz óndiretin ınfraqurylymdar qurdymǵa ketedi», - dedi ǵalym.
