Klımatqa baılanysty Mańǵystaý oblysynda sý tasqyny bolý qaýpi tómen – qutqarýshylar

AQTAÝ. QazAqparat – Mańǵystaý oblysynda klımattyq jaǵdaılarǵa baılanysty sý tasqynynyń bolý qaýpi tómen. Eger óńirdi sý basatyndaı jaǵdaı bolsa, zardap shekken adamdarǵa 900 jatyn oryn jáne jetkilikti túrde tósek jabdyqtar beriledi. Bul týraly Qoǵamdyq kommýnıkatsııa ortalyǵynda ótken brıfıngide oblystyq Tótenshe jaǵdaılar departamentiniń bólim bastyǵy Danııar Elshibaev aıtty, dep habarlaıdy QazAqparat tilshisi.

Mańǵystaý óńirinde sý tasqynynyń aldyn alý úshin jyl basynan 5150 tonnadan astam ınertti materıal, qum salynǵan 2700 qap jáne 6915 tonna janar-jaǵarmaı qory daıyndaldy.

«Qazirgi tańda tıisti merdiger mekemeler sý ótkizý qurylystaryna júıeli túrde tazartý jumystaryn júrgizip jatyr. 2023 jyly naýryzda respýblıkalyq komandalyq-shtabtyq oqý-jattyǵýy ótip, azamattyq qorǵaý qyzmetteriniń jáne jergilikti atqarýshy organdardyń tótenshe jaǵdaılarǵa daıyndyǵy tekserildi. Búginde oblys boıynsha avtojoldarda 1059, al temir joldarda 567 sý ótkizý qurylysy men kópir tazartyldy jáne olar jaramdy», - dedi Danııar Elshibaev.

Sonymen qatar spıker Mańǵystaý oblysynda klımattyq jaǵdaılarǵa baılanysty sý tasqynynyń bolý qaýpi tómen ekenin aıtyp ótti. Alaıda qaýipsizdik talaptaryn qatań saqtaý mańyzdy.

«Sý tasqyny kezinde úıińizdi sý almas úshin, oıyq jerlerge qurylys jumystaryn júrgizbeý kerek. Sý tez jınalatyn mekenderden aýlaq bolǵanyńyz abzal. Eger óńirdi qalyń qar basyp, jańbyr tolassyz jaýsa, birden shara qabyladýǵa tyrysyńyz. Úı salǵan kezde de irgetasyn bıik ári sý ótpeıtindeı myqty qylyp qalaǵan jón», - deıdi ol.