Klımat, ekonomıka, tehnologııa: Astana men Berlın yntymaqtastyqty keńeıtedi
ASTANA. KAZINFORM — Májilis tóraǵasy Erlan Qoshanov Astanaǵa resmı saparmen kelgen Germanııa Býndesratynyń Prezıdenti Anke Relıngermen kezdesti. Bul týraly Májilistiń baspasóz qyzmeti habarlady.
Májilis spıkeri Býndesrat tóraǵasynyń sapary mazmundy ótip jatqanyn aıtty. Buǵan deıin Anke Relıngerdi Qazaqstan Prezıdenti Qasym-Jomart Toqaev qabyldady, sondaı-aq ol Premer-mınıstr Oljas Bektenovpen jáne Senat tóraǵasy Máýlen Áshimbaevpen kelissózder júrgizdi.
Erlan Qoshanov Qazaqstan Germanııany Eýropadaǵy negizgi strategııalyq seriktes retinde qarastyratynyn atap ótti.
— Eki el arasyndaǵy saıası dıalog ózara túsinistik pen senim rýhynda damyp keledi. Sońǵy jyldary joǵary deńgeıde sapar almasý óte belsendi júrgizilip jatyr. Ol — 2023 jylǵy maýsym aıynda Germanııanyń Federaldy Prezıdenti Frank-Valter Shtaınmaıerdiń Qazaqstanǵa jasaǵan sapary, 2023 jylǵy qyrkúıek aıynda Prezıdent Qasym-Jomart Toqaevtyń Germanııaǵa jasaǵan sapary, sondaı-aq Germanııa Federaldy Kantsleri Olaf Sholtstyń sapary men sonyń aıasynda ótken «Ortalyq Azııa — Germanııa» formatyndaǵy ekinshi sammıi, — dedi Májilis spıkeri.
Májilis tóraǵasy parlamentaralyq baılanys saıası dıalogtyń mańyzdy bólshegine aınalǵanyna nazar aýdardy. Ol Anke Relıngerdiń sapary parlamenttik yqpaldastyqqa tyń serpin beretinine senim bildirdi.
Sonymen qatar Májilis spıkeri germanııalyq áriptesterine Memleket basshysynyń «Kúshti Prezıdent — yqpaldy Parlament — esep beretin Úkimet» formýlasy aıasynda júrgizilip jatqan Qazaqstandaǵy aýqymdy reformalar týraly málimet berdi. Ásirese, kóppartııaly Májilistiń jumysyna, áleýmettik ádildikti, zań ústemdigi men tártipti ilgeriletýge, sondaı-aq ekonomıkany damytýǵa baǵyttalǵan zańdarǵa erekshe kóńil bóldi.
Óz kezeginde Býndesrat Prezıdenti Qazaqstandaǵy saıası ózgerister men ekonomıkalyq jetistikterdi qoldady. Geosaıası turaqsyzdyq jaǵdaıynda Qazaqstan Germanııanyń senimdi seriktesi bolyp otyrǵanyna nazar aýdardy. Sondaı-aq klımattyń ózgerýimen kúres, ekonomıkalyq yntymaqtastyq, mádenı-gýmanıtarlyq baılanystardy nyǵaıtý sııaqty baǵyttarda seriktestikti tereńdetýge Germanııa tarapynan qyzyǵýshylyq bar ekenin bildirdi.
Taraptar aýyl sharýashylyǵy, logıstıka, ónerkásip jáne jańa tehnologııalar salalarynda yntymaqtastyqty nyǵaıtý múmkindikterin de talqylady.
Depýtattar jańa jobalardy zańnamalyq turǵydan qoldaýǵa daıyn ekendikterin aıtty.
Kezdesý barysynda Parlamentaralyq odaq, EQYU jáne Eýropa Keńesi Parlamenttik assambleıalary sııaqty halyqaralyq parlamenttik uıymdar aıasyndaǵy ózara is-áreket máseleleri de qozǵaldy.
Aıta ketelik Memleket basshysy Germanııa Býndesratynyń Prezıdenti Anke Relıngermen kezdesti.