Klıentterin aldaǵan «Faraon» týrfırmasynyń dırektory jazasyn jeńildete almady
QARAǴANDY. QazAqparat - Qaraǵandy oblystyq sotynyń apellıatsııalyq alqasy alaıaqtaǵy úshin 4,5 jylǵa sottalǵan «Faraon» týrfırmasynyń dırektory Janar Ábeýiptiń úkimin kúshinde qaldyrdy, dep habarlady «QazAqparat» HAA tilshisi.
«Sýdıa Rashıd Nurmaǵambetovtiń tóraǵalyǵymen apellıatsııalyq alqa sottalýshy Janar Ábeýip pen onyń advokatynyń shaǵymyn qarady. Alqa músheleri Qazybek bı aýdandyq sotynyń 2016 jylǵy 30 qarashadaǵy úkimi zańdy jáne negizdi, ózgertýge jatpaıdy degen tujyrymǵa keldi. Qaýlyǵa sáıkes apellıatsııalyq shaǵym qanaǵattandyrýsyz qaldyryldy», - dedi sottyń baspasóz qyzmetinde.
Apellıatsııalyq qaýly zańdy kúshine endi.
Onyń advokaty qorǵalýshynyń áreketin qaıta qaraýdy ótindi. Ol Ábeýip alaıaqtyq jasaǵan joq, isti azamattyq-quqyqtyq alańda qaraý qajettigin talap etti. Budan basqa, advokat onyń jas balalary baryn eskerýdi surady. Sot otyrysyna Ábeýip tergeý ızolıatorynda dúnıege kelgen segiz aılyq balasymen keldi.
Eske salsaq, Qazybek bı aýdandyń sotynyń úkimimen Ábeýip iri kólemdegi alaıaqtyǵy úshin múlki tárkilene otyryp, jalpy rejimdegi túzeý mekemesinde jazasyn óteýmen 4,5 jylǵa sottalǵan.
Qaraǵandyda 2015 jylǵy jazda kezekti týrıstik daý-damaı týyndady. Túrkııaǵa demalysqa «Faraon» fırmasynan joldama satyp alǵan klıentter demalysqa bara almaı qalǵan. 100-den astam adam jábirlenýshi retinde tanyldy. Shyǵyn shamamen 400 myń AQSh dollaryna baǵalandy.
