Klebanov pen Kan Ekibastuz JEO-syn qala bıligine ótkizip berdi
PAVLODAR. KAZINFORM — Ekibastuz JEO aktsıonerleri Aleksandr Klebanov pen Sergeı Kan jalpy quny 3,7 mlrd teńge turatyn múlikterdi Ekibastuz qalasy ákimdiginiń balansyna ótkizdi. Bul — jylý stansasyndaǵy múlikterdi qalanyń kommýnaldyq menshigine berýdiń ekinshi «transhy».
Túsiniktirek bolýy úshin aıtyp óteıik, Forbes tizimindegi eń dáýletti adamdardyń reıtınginen túspeıtin qos bıznesmen ıeligindegi «OAEK» AQ arqyly «Pavlodarenergo» AQ kompanııasynyń aktsııalaryn ıemdenip otyr.
Al «Pavlodarenergo» kompanııasy osy ýaqytqa deıin Ekibastuz jylý-energııa ortalyǵyn basqaryp keldi.
Buǵan deıin habarlaǵanymyzdaı, Ekibastuz qalasynyń ákimdigi Ekibastuz JEO-syn «Samuryq-Energoǵa» senimgerlik basqarýǵa berdi. Aktsıonerlik qoǵam stansany «Energy Solution Center» JShS enshiles kompanııasy arqyly basqarady.
Bıznestik toptyń 2023 jylǵa shoǵyrlandyrylǵan esebinde aıtylǵandaı, Aleksandr Klebanov pen Sergeı Kan Ekibastuz qalasynyń ákimdigine Ekibastuz JEO-synyń jalpy quny 3,7 mlrd teńge turatyn múlikterin bergen.
Bul degenimiz — óndiristik, ákimshilik ǵımarattar men qurylystar, negizgi jáne qosalqy qazandyq jabdyqtary.
Forbes.kz habarlaǵandaı, múlikti ótkizý is-sharalary 2024 jyldyń mamyr aıynda júrgizilgen, biraq esep jarııalanǵan ýaqytta (2024 jyldyń 26 maýsymy kúni) «Pavlodarenergo» AQ men onyń enshiles kompanııasy Ekibastuzda jylý qýatyn óndirýmen jáne satýmen áli de bolsyn shuǵyldanyp otyrǵany aıtylady.
«Bul — múlikti ákimdik balansyna berýdiń ekinshi „transhy“. Buǵan deıin 2023 jyldyń aqpan aıynda kompanııa quny 1,8 mlrd teńge turatyn jylý jelilerin, negizgi jáne qosalqy qazandyq jabdyqtaryn ákimdikke ótkizgen. Sol ýaqytta Memleket basshysynyń tapsyrmasy boıynsha bıznestik top pen Ekibastuz qalasynyń bıligi „Ekibastuz JEO-synyń jumysyn qalpyna keltirý boıynsha is-áreketter josparyn“ ázirlegen edi», — delingen materıalda.
«Pavlodarenergo» AQ baspasóz qyzmeti qazirgi ýaqytta Ekibastuz JEO tolyǵymen «Samuryq-Energoǵa» senimgerlik basqarýǵa berilgenin naqtylady, ıaǵnı «Energy Solution Center» JShS kásiporyndy tolyǵymen baqylaýǵa alǵan.
«Qazirgi ýaqytta Ekibastuzdaǵy jylý-energııa ortalyǵyna qatysty aqparat berý bizdiń quzyrymyzǵa jatpaıdy, sebebi ol endi 100% Samuryq-Energonyń basqarýynda. Al Ekibastuz qalasy ákimdiginiń balansyndaǵy jylý jelileri — Pavlodarenergo kompanııasynyń senimgerlik basqarýynda. Biz qalany jylýmen qamtý protsesine osy jeliler arqyly ǵana qatysa alamyz», — dep málimdedi kompanııadan.
Eske sala keteıik, 2022 jyldyń 27 qarasha túni saqyldaǵan sary aıazda Ekibastuz JEO-synda bolǵan apattan qalanyń basym bóligi jylýsyz qaldy.
Sol ýaqytta Aleksandr Klebanov JEO aktıvterin 2008 jyly jeke kompanııadan satyp alǵanyn aıtqan edi.
«Biz jylý jelileriniń tozý máselesin buǵan deıin de birneshe ret kóterdik. Alaıda jeke kompanııa retinde tutynýshylar úshin belgilengen tarıftik baǵany kótere almaımyz. Sol sebepti de kásiporynnyń shyǵyny áýel bastan kóp. Kásiporynnyń kirisi tipti stansany qamtamasyz etýge de jetpedi. Biz JEO-ny memleket menshigine berýge daıyn eken¬digimiz týraly aqparat taralyp jatyr. Buǵan deıin de birneshe jyl qatarynan JEO-ny qala qaramaǵyna berýge usynys bildirdik. Osyny eskerý mańyzdy. Al endi barlyq jaǵdaıdy eskere otyryp, qazirgi jaıtty ornyna keltirýge jáne „Ekibastuz jylý-energııa“ kapıtalyna memlekettiń de qatysý múmkindigin qarastyrýǵa daıynbyz», — deı kele stansany jergilikti bılikke 1 teńgege satýǵa daıyn ekenin málimdegen.
Qazirgi ýaqytta «Pavlodarenergo» AQ-nyń menshik ıesi «OAEK» AQ-nyń negizgi aktsıonerleri — Sergeı Kan men Aleksandr Klebanov.
Olardyń árqaısysynyń enshisindegi aktsııa úlesi — 47,1%. Buǵan qosa ekeýiniń «Ortalyq Azııa otyn-energetıkalyq kompanııasynda» 50%-dan úlesi bar.
Aleksandr Klebanov elimizdegi eń baı adamdardyń tiziminde 12-shi, eń yqpaldy bıznesmender arasynda 50-shi orynda tur.
Forbes Kazakhstan onyń dáýletin shamamen 815 mln AQSh dollary dep baǵalaıdy.
Al Sergeı Kan alǵashqy atalǵan tizimde 31-shi orynda tur. Onyń dáýleti shamamen — 292 mln AQSh dollary. Kásipker «Circle Maritime Invest» AQ keme qatynasy kompanııasynyń 50% aktsııasyna da ıelik etedi.
Ekibastuz JEO-synyń qala ákimdigi balansyna ótýi týraly máselege qatysty ákimdikten túsinik berýdi suradyq. Ázirge jaýap bolmady.
