"Klassıka" radıosynyń jarty jyldyq jumysyn qorytyndylaýǵa arnalǵan dóńgelek ústel májilisi ótti

Sazger Aqtoty Raıymqulovanyń aıtýynsha, "klassıka" degen sózdiń aýdarmasy úlgi degen maǵynany bildiredi. Ol tárbıemizdiń, kúndelikti ómirimizdiń mýzykanyń úlgisi dep aıtýǵa bolady. Óıtkeni eýropalyq mýzykanyń da, dástúrli mýzykanyń da ózindik úlgisi bar. Qazaq halqy ózderiniń dástúrli mýzykasyn jaqsy tyńdaıdy. Óıtkeni ol qanymyzǵa sińip ketken, úıde áke-sheshemiz, aǵa-ápkelerimiz án aıtyp, kúı tartady. Sondyqtan janymyzǵa jaqyn.

"Klassıka" radıosy bizdiń ómirimizge tarıhtyń ártúrli kezeńinen ótken mýzyka men ómirdiń úlgisin usynýda. Onyń qazirdiń ózinde ózindik tyńdarmany qalyptasyp úlgerdi. Árıne ol ázirge jalpyhalyqtyq sıpat ala qoıǵan joq. Sebebi árbir nárseni adam kishkentaı kezinen bastap úırenip, boıyna sińirip ósedi. Sondyqtan eýropalyq mýzyka úlgisin barlyq adam birdeı qabyldamaýy múmkin", - deıdi Qazaqtyń Qurmanǵazy atyndaǵy ulttyq konservatorııasynyń prorektory A. Raıymqulova.