«Klassık ustahanasy»: Astanada qalamgerler kópshilikke dáris oqıdy
ASTANA. KAZINFORM — Astana qalasy Tilderdi damytý jáne arhıv isi basqarmasy men Qazaqstan Jazýshylar odaǵynyń Astana qalasy boıynsha fılıalynyń uıymdastyrýymen «Klassık ustahanasy» atty jańa jobasy bastaldy. Bul jobada elordalyq qalamgerler kópshilikke dáris oqıtyn bolady. Bul týraly elorda ákimdiginiń resmı saıty jazdy.
— «Klassık ustahanasy» — bul qazaq ádebıetiniń ortamyzda júrgen klassıkteri men belgili shyǵarmashylyq ókilderiniń ómirlik tájirıbesin keıingi urpaqqa jetkizý ıdeıasynan týǵan joba. Atalǵan joba qazaq ádebıeti maıtalmandarynyń oılary men ıdeıalaryn, shyǵarmashylyq ádisterin bolashaq qalamgerlerge jáne ádebıet súıer qaýymǵa usynatyn sheberhana ispetti, — delingen habarlamada.
Jobanyń maqsaty — qazaq ádebıetiniń klassıkteri men tanymal qalamgerlerdiń shyǵarmashylyq tájirıbesin keńinen tanytý, ádebıetke qyzyǵýshylyq tanytatyn jastarǵa baǵyt-baǵdar berý, olardyń kórkem shyǵarmashylyq qabiletin damytýǵa kómektesý, ulttyq ádebıettiń mańyzdylyǵyn arttyrý arqyly rýhanı qundylyqtardy dáripteý. Qazaq qalamgerleriniń ómir joly, jazý stıli men shyǵarmashylyq protsesterin tereńirek zertteý, qazirgi zaman ádebıetiniń trendteri men baǵyttaryn talqylaý, ádebıettegi oı erkindigi men kreatıvtilik máselelerin kóterý, jazýshylardyń jas býynǵa motıvatsııa berýin qamtamasyz etý, oqyrmandar arasynda ádebıetti nasıhattaý.
3 qyrkúıekten bastaý alǵan jobanyń qonaqtary jazýshy Tólen Ábdik, Tursyn Jurtbaı, Qoıshyǵara Salǵara, Asqar Altaı, aqyn Janat Áskerbekqyzy. Joba ár aptanyń sársenbi kúnderi uıymdastyrylyp otyrady. Atalǵan jobanyń kelesi qonaǵy jazýshy-dramatýrg Ermek Amanshaev.
Shara 17 qazan kúni saǵat 15.00-de QR Ulttyq akademııalyq kitaphanada ótedi. Atalǵan is-sharaǵa zııaly qaýym ókilderi, oqyrmandar jáne jas ádebıetshiler qatysady. Dáris sońynda jazýshy tyńdarmandarmen erkin pikir almasyp, suraqtarǵa jaýap beretin bolady.
Іs-shara áleýmettik jelilerde jáne tolyq nusqasy YouTube arnasynda jarııalanyp otyrady.
Bul joba jyl sońyna deıin jalǵasatyn bolady.
Buǵan deıin habarlanǵandaı, Máskeý sahnasynda qazaq ádebıetiniń klassıgi Tólen Ábdiktiń shyǵarmalary dáripteldi.