QQS tóleý keıinge qaldyrylatyn ımporttyq taýarlar tizbesi bekitildi

ASTANA. KAZINFORM — QR Ulttyq ekonomıka mınıstrligi qaıta óńdeý úshin ákelinetin taýarlar tizbesin belgileý týraly buıryqty bekitkeni belgili boldy.

Vedomstvo málimetinshe, olardyń ımporty kezinde kásiporyndar qosylǵan qun salyǵyn (QQS) tóleýdi keıinge qaldyra alady. Sondaı-aq qujat Qazaqstan Respýblıkasy Salyq kodeksiniń 134-babynyń 2-tarmaǵyna sáıkes, osyndaı keıinge qaldyrýǵa quqyǵy bar salyq tóleýshiler sanatyn aıqyndaıdy.

— Bul rette tizbeniń kúshi Eýrazııalyq ekonomıkalyq odaqqa qatysýshy elderdiń taýar ımportyna qoldanylmaıdy. Tizimge Qazaqstanda óndirilmeıtin nemese ishki naryqtyń qajettiligin ótemeıtin, biraq bul rette qaıta óńdeý salasyna qajet taýarlar engizilgen. Qabyldanǵan buıryq qaıta óńdeý óndirisine arnalǵan shıkizat pen komponentterge qol jetkizedi. QQS tóleýdi keıinge qaldyrý kásiporyndarǵa qajetti taýardy ákelý kezinde aınalym qarajatynan almaýǵa múmkindik beredi. Osylaısha olardyń qarjysy turaqty bolmaq, — delingen mınıstrlik taratqan habarlamada.

UEM atap ótkendeı, keıinge qaldyrý tártibi men merzimin salyq pen bıýdjetke tólenetin basqa da mindetti tólemdi ákimshilendirýge jaýapty ýákiletti organ belgileıdi.

Budan buryn taýar eksporttaýshylar úshin QQS qaıtarý protsesi jeńildetiletinin jazǵan edik.