QQS-tiń 16 paıyzǵa deıin artýy teńge baǵamyna qalaı áser etedi
ASTANA. KAZINFORM — Ulttyq bank tóraǵasy Tımýr Súleımenov aldaǵy salyq reformalaryna qaramastan teńge baǵamynyń nelikten nyǵaıyp kele jatqanyn túsindirdi. Ulttyq bank basshysy valıýta naryǵynda teńge baǵamyna yqpal etetin 2 trendtiń bar ekenin aıtty. Onyń biri — 2026 jyldyń qańtarynan bastap QQS-tiń 16 paıyzǵa deıin artýymen baılanysty tutynýshylyq suranystyń ósimi.
— Kóptegen kásiporyn men úı sharýashylyqtary salyq reformalaryna deıin, ıaǵnı QQS 16 paıyzǵa kóterilgenge deıin múmkindiginshe kóp satyp alýǵa tyrysady. Eger siz jeltoqsanda kir jýǵysh mashına nemese telefon ımporttasańyz, onda siz 12 paıyz QQS tóleısiz, al qańtarda ol 16 paıyz bolady. Soǵan oraı qazirgi ýaqytta ımportqa suranys joǵary ekenin kórip otyrmyz. Al ımport dollarmen júzege asyrylady. Demek, siz dollarlyq kelisimshartpen ımporttaısyz. Sondyqtan dollarǵa suranys óte joǵary, — dedi ol.
Sonymen qatar, Ulttyq bank basshysy osy jaǵdaılarda teńge baǵamynyń kerisinshe kóteriletinine nazar aýdartady. Onyń aıtýynsha, bul bıyl qazan aıynda bazalyq paıyzdyq mólsherlemeniń 18 paıyzǵa kóterilýimen baılanysty. Aqsha-kredıt saıasatyn qatańdatýdyń arqasynda teńgelik quraldar halyqaralyq ınvestorlar úshin tartymdy bola tústi.
— Bıyl ortasha eseppen bizdiń naryqta beıindi ınvestıtsııalardyń kólemi shamamen eki mıllıard dollar boldy. Qazirgi kezde teńgelik quraldardyń quny óskendikten, ınvestıtsııalyq qaýymdastyq Ulttyq bank pen Úkimettiń ınflıatsııamen kúresýde birlesip jumys istep jatqanyn baıqap otyr. ıAǵnı kúrt ózgeristerdi kútýge negiz joq, — dedi ol.
Tımýr Súleımenov kapıtal qozǵalysy úshin qolaıly ahýal bar ekendigin atap ótti. Qazirgi ýaqytta Qazaqstan naryǵyna álemdik oıynshylardan iri portfeldi ınvestıtsııalary kelip jatyr.
— Aıtalyq, Londonda, Nıý-Iorkte nemese Abý-Dabıde otyrǵan Citibank, Goldman Sachs, JP Morgan sııaqty ınvestıtsııalyq basqarýshynyń aldynda birneshe naryqtar tur. Ol qaıda ınvestıtsııa salý kerek ekendigin tańdaı alady. Árıne, ol dollarmen jumys isteıdi. Ol Qazaqstanda qundy qaǵazdar, máselen Qarjy mınıstrliginiń oblıgatsııalaryn satyp alý úshin dollarlaryn teńgege aıyrbastaýy kerek. Sebebi qundy qaǵaz teńgemen satylyp jatyr. Osylaısha, naryqqa kelgende ol dollaryn aıyrbastap, teńgelik qaǵazdar satyp alady. Dollardy aıyrbastaý arqyly ol dollar usynysyn kóbeıtedi, ıaǵnı naryqta dollar kóp bolady. Osylaısha, sońǵy ınvestorlar bizge qosymsha 1,4 mıllıard dollar ákeldi, — dep túsindirdi Tımýr Súleımenov.
Sondaı-aq ol jaqyn arada teńge baǵamynyń kúrt qubylýyna negiz joq ekenin aıtty.