QQS salynatyn aınalymnyń tómengi shegi 40 mln teńge bolady – Serik Jumanǵarın

ASTANA. KAZINFORM – Premer-mınıstrdiń orynbasary – Ulttyq ekonomıka mınıstri Serik Jumanǵarın Májilistiń jalpy otyrysynda Salyq kodeksiniń jobasyndaǵy sońǵy ózgeristerdi atady.

- Birinshi, qosylǵan qun salyǵy 16 protsent bolady. Ekinshi, qosylǵan qun salyǵynyń shegi 40 mln teńge mólsherinde belgilenedi. 40 mln teńge degen ortaq baılam boldy. Úkimet pen depýtattardyń konstrýktıvti ustanymynyń arqasynda osyndaı ymyraǵa qol jetkizdik. Biraq mundaı shek bolǵanda 160 myń salyq tóleýshiden aıyrylatynymyzdy aıtqym keledi. Sondaı shamamen 400 mlrd teńgedeı qosymsha bıýdjet túsiminen qaǵylamyz. Bizdiń bıznesmender Úkimet te, Parlament te osyndaı ymyraǵa barýǵa daıyn ekenin túsinsin dep aıtyp turmyn, - dedi Serik Jumanǵarın.

Aıta keteıik, buǵan deıin Ulttyq bank qandaı jaǵdaıda ınterventsııa jasaıtyny habarlandy.

Sondaı-aq Ulttyq bank tóraǵasy Tımýr Súleımenov Úkimettiń qosylǵan qun salyǵyn kóterý bastamasyn qoldaıtynyn, QQS-ty kóterý týraly jańalyqtar ınflıatsııaǵa qalaı áser etip jatqanyn aıtty.