QQS ótemaqysy qaıtaryla ma - Memlekettik kirister komıtetiniń jaýaby

NUR-SULTAN. QazAqparat – QR Qarjy mınıstrliginiń Memlekettik kirister komıteti Youtube jelisinde jáne túrli messendjerde taraǵan qosylǵan qun salyǵynyń ótemaqysy qaıtarylatyny týraly vıdeonyń jalǵan ekenin málimdedi, dep habarlaıdy QazAqparat tilshisi.

Aıta keteıik, jańa jyldyń aldynda qazaqstandyqtar WhatsApp arqyly Youtube jelisinde jarııalanǵan vıdeony tarata bastady. «Soobşılı novost» dep atalatyn rolıkte «tax free» boıynsha qosarlanǵan qun salyǵynyń ótemaqysyn qaıtarý tártibi jaıynda aıtylady. Onymen 100 000 -1 500 000 teńgeniń ótemaqysyn alýǵa bolady-mys. Vıdeoǵa sáıkes, aldymen arnaıy saıtqa ótý kerek. Odan keıin 5 myń teńgeniń kóleminde zańgerlerdiń aqysy tólenedi. Sońynda bank kartasynyń nómirin engizý arqyly ótemaqyny alýǵa bolady. Vıdeo avtorlary bul habarlamany respýblıkalyq telearnalardyń biri efırde kórsetkendeı etip montajdaǵan. Jyldyń aıaǵyna qaraı bul vıdeonyń jalpy qaralym sany 1 mıllıonnan asyp ketken.

«Týyndaǵan suraqtardy nazarǵa ala otyryp, Memlekettik kirister komıteti bul aqparatty joqqa shyǵarady jáne bul - alaıaqtardyń áreketi ekendigine basa mán berýge shaqyrady. Eske sala keteıik, Qazaqstanda »tax free« júıesi bar. Biraq ol tek sheteldik týrıster úshin Almatydaǵy »Esentai Mall« saýda ortalyǵynda ilki joba retinde qolǵa alynǵan. Oǵan sáıkes, azyq-túlikke jatpaıtyn taýarlardyń qosarlanǵan qun salyǵy qaıtarylady», - dep atap ótedi komıtetten.