QQS mólsherlemesin kóterý máselesi jan-jaqty pysyqtaýdy qajet etedi – senator

Senator Lázzat Rysbekova shaǵyn jáne orta bıznes salasynda salyq saıasatyn jetildirý kerek ekenin aıtty, dep habarlaıdy Kazinform. 

«Júıelik problema shaǵyn jáne orta bıznes salasynda salyq saıasatynyń jetildirilmeýine baılanysty. Qazir dál osy másele boıynsha kásipkerler biraz narazylyq aıtyp jatyr. Birinshi kezekte bul qosylǵan qun salyǵyna qatysty, ıaǵnı onyń mólsherlemesin 12 paıyzdan 16 paıyzǵa deıin ósirý eskerilgen. Sondyqtan QQS mólsherlemesin kóterý máselesi jan-jaqty zerdeleýdi jáne otandyq kásipkerlermen talqylaýdy qajet etedi dep sanaımyz. Sonymen qatar Úkimet bızneske salyq aýyrtpalyǵyn ulǵaıtpaıtyn balama nusqalardy qarastyrýy kerek. Munymen qosa, QQS-ty qaıtarý problemasy sheshýdi talap etedi», - dedi L.Rysbekova Senatta «Qazaqstan Respýblıkasynda shaǵyn jáne orta kásipkerlikti damytý» taqyrybynda ótip jatqan Úkimet saǵatynda.

Depýtat salyq saıasatynda bıznes pen memleket múddeleriniń teńgerimin eskerý kerek ekenin aıtty. Fıskaldy is-sharalar shaǵyn bıznesti nyǵaıtýǵa, ıaǵnı irilendirýge baǵyttalýy tıis.

«Ókinishke qaraı, qazir kóńil kónshitpeıtin jaǵdaıdy baıqap turmyz. Atap aıtqanda, kásipkerlik sýbektileriniń usaqtalyp jatqanyn kórip jatyrmyz. Osydan shaǵyn kásiporyndar sany aıtarlyqtaı ósip keledi. Kásipkerlerdiń aıtýynsha, bul úrdiske áser etetin sebepterdiń 80 paıyzy qazirgi salyq júıesine baılanysty. Al 20 paıyzy shaǵyn kásipkerlikke kóbirek baǵyttalǵan memlekettik qoldaý qadamdaryna qatysty», - dedi senator.

Budan buryn habarlanǵandaı, Ulttyq ekonomıka mınıstrligi qosylǵan qun salyǵyn (QQS) 12%-dan 16%-ǵa kóterýdi usyndy.