QQS mólsherlemesin arttyrý munaıdan túsetin kiriske táýeldilikti azaıtady – vıtse-mınıstr
ASTANA. KAZINFORM - Úkimet ókilderi Aqtóbe oblysynyń bıznes-qaýymdastyǵymen Salyq kodeksine engizilgen túzetýler týraly talqylady, dep habarlaıdy Úkimettiń baspasóz qyzmeti.
Quramynda QR Ulttyq ekonomıka vıtse-mınıstri Baýyrjan Omarbekov pen QR Qarjy mınıstrligi Memlekettik kirister komıteti tóraǵasynyń orynbasary Jánibek Nurjanov kirgen jumys toby 250-den astam qatysýshynyń basyn qosty, kezdesýge kásipkerler, máslıhat pen «Atameken» kásipkerler palatasynyń ókilderi qatysty.
Kezdesýdiń basty taqyryby Úkimettiń QQS boıynsha saralanǵan mólsherlemelerin belgileý: 16%, 10%, 0% jáne bosatý jónindegi usynystaryn talqylaý boldy. Sondaı-aq agroónerkásip kesheni úshin QQS-ty tolyǵymen alyp tastaý jáne densaýlyq saqtaý men kommertsııalyq medıtsına salalary úshin 10%-dyq aralyq mólsherlemeni engizý boıynsha usynystar qarastyryldy.
- Biz 2023 jyldan beri usynys retinde aıtyp kele jatqan 0% jáne 10% saralanǵan mólsherleme tujyrymyn qabyldaǵanymyzǵa razymyz. Sizder ázirge medıtsınaǵa 10% dep otyrsyzdar. Basqa nusqalar bolady ma, álde biz qazir kimdi qosýǵa bolatynyn usyna alamyz ba?, — dep suraq qoıdy «Atameken» palatasy Saýda jáne qyzmet kórsetý salalyq keńesiniń qarjylyq qyzmet kishi sektorynyń basshysy, kásipker Vıktorııa Isarova.
Ulttyq ekonomıka vıtse-mınıstri bul máselede QQS bıýdjetti tolyqtyrýdyń negizgi kózderiniń biri ekenin túsiný mańyzdy ekenin atap ótti.
- QQS mólsherlemesin arttyrý jáne saralaý bıýdjettiń munaıdan túsetin ózgermeli kiristerine táýeldiligin azaıtýǵa jáne memlekettik basym jobalardy qarjylandyrýǵa múmkindik beredi. Biz aýyl sharýashylyǵy ónimderin óndirýshilerdi QQS-tan bosatýdy usynamyz. Qazirgi ýaqytta sharýa qojalyqtary QQS tólemeıdi jáne biz ony solaı qaldyramyz. Aýyl sharýashylyǵymen aınalysatyn zańdy tulǵalar qajetti somanyń 30%-yn tóleıdi. Endi olar bul salyqtan bosatylyp, kartop, qyzanaq, pııaz jáne qyryqqabat sııaqty basqa da ónimderdi básekege qabiletti etedi. 10%-dyq mólsherleme kimge qatysty beriledi degen suraq qosymsha talqylaýdy qajet etedi. Sondaı-aq biz densaýlyq saqtaý salasy úshin tómendetilgen mólsherlemeni usynamyz. Barlyq usynys jınaqtalyp, talqylanady, sodan keıin baryp Sizdermen birlesip sheshiledi, — dedi Baýyrjan Omarbekov.
Sonymen qatar is-sharaǵa qatysýshylar úshin qarjy ınstıtýttary, EDB, «Atameken» palatasy jáne basqa da uıymdar ókilderinen konsýltatsııalar uıymdastyryldy, bul kásipkerlerge qosymsha túsindirmeler men keńes alýǵa múmkindik berdi.
Osyǵan deıin Úkimet QQS 16% bolsa, áleýmettik salyq pen zeınetaqy jarnalaryn tóleý ózgerissiz qalatyny týraly aıtty.