QQS boıynsha tirkeý talaptaryn buzǵandarǵa qandaı shara qoldanylady
ASTANA. KAZINFORM — QR Qarjy mınıstrliginiń Memlekettik kirister komıteti salyqtyq tirkeý talaptarynyń saqtalýyn baqylaý maqsatynda monıtorıng júrgizbek. Bul týraly QQS ákimshilendirý basqarmasynyń basshysy Edil Ázimshaıyq aıtyp berdi.
Onyń aıtýynsha, Jańa Salyq kodeksinde birqatar ózgeris qarastyrylǵan, onyń ishinde qosylǵan qun salyǵyn tóleýshi retinde tirkeý esebine qoıý tártibi de ózgeredi.
Jańa tártip 2026 jyldyń 1 qańtarynan bastap kúshine enedi jáne esepke alýdyń 3 túrin — erikti, mindetti, shartty esepke alýdy qarastyrady.
Baqylaý sharasy tek mindetti QQS boıynsha esepke qoıýǵa emes, jeke kásipkerlerge, jeke tájirıbemen aınalysatyn tulǵalarǵa jáne jekelegen qyzmet túrlerin kórsetetin salyq tóleýshilerge de qatysty bolady.
– Zańbuzýshylyq anyqtalǵan jaǵdaıda salyq tóleýshige habarlama jiberiledi. Ony 30 jumys kúni ishinde oryndaý qajet. Eger habarlama belgilengen merzimde oryndalmasa, salyq tóleýshiniń bank shottarynda shyǵys operatsııalary toqtatylady. Bul shekteý zańbuzýshylyq joıylǵan kezde, ıaǵnı habarlama oryndalǵan soń alynyp tastalady, – dep túsindirdi Edil Ázimshaıyq elordada ótken baspasóz máslıhatynda.
Sonymen birge, salyq tóleýshi habarlama mazmunymen kelisken jaǵdaıda esepke turady, al kelispegen jaǵdaıda – túsindirme men rastaıtyn qujattardy usynýy qajet.
Eger túsindirmede negizdeme bolmasa nemese qujat túrinde rastalmasa, salyq organdary 20 jumys kúni ishinde habarlamanyń oryndalmaǵany týraly sheshim qabyldaıdy. Mundaı jaǵdaıda habarlama oryndalmaǵan dep tanylǵannan keıin salyqtyq tekserý júrgiziledi.
Aıta keteıik, 2026 jylǵy 1 qańtardan bastap Qazaqstanda jańa Salyq kodeksi kúshine enedi. Onda QQS boıynsha esepke qoıý shegi 20 000 AEK-ten 10 000 AEK-ke deıin eki ese tómendeıdi. ıAǵnı, qazir jyldyq aınalymy 78,6 mıllıon teńgeden asatyn kompanııalarǵa qoldanylatyn salyqtyq rejım 2026 jyldyń qańtarynan bastap 43,3 mıllıon teńgege deıin tómendeıdi.
Endi sheteldik onlaın-dúkender de QQS boıynsha shartty esepke qoıylyp, salyq tóleıdi.