QQS boıynsha ózgeris: zeınetaqy men járdemaqy ındeksteledi

ASTANA. KAZINFORM — Jańa Salyq kodeksi aıasynda QQS esebinen baǵa ósimi bolsa, áleýmettik turǵyda az qorǵalǵan adamdardyń eńbekaqysy men tólemderi ındeksteledi. Bul týraly Parlamenti Májilisi janyndaǵy Qoǵamdyq palata otyrysynda Ulttyq ekonomıka birinshi vıtse-mınıstri Azamat Amrın málim etti.

— QQS esebinen baǵa ósimine toqtalsaq, tıisti esep-qısap barysynda qosymsha 3 paıyzǵa deıin ınflıatsııa bolýy múmkin ekeni anyqtaldy. Osy ınflıatsııalyq modeldi Ulttyq bankt te rastady. Sondyqtan jalaqyny, zeınetaqyny jáne járdemaqyny ındeksteý qajet bolady. Bul turǵyda qosymsha 600 mlrd teńge kerek. Atap aıtqanda, qosymsha 4-5 trln teńge (jańa Salyq kodeksi aıasynda QQS 16 paıyz bolsa) jınalatynyn eskersek, bul soma ındeksteý boıynsha shyǵystardy jabýǵa múmkindik beredi, — dedi Azamat Ámrın.

Eske salsaq, 9 sáýir kúni Parlament Májilisi Salyq kodeksiniń jańa jobasyn birinshi oqylymda maquldady.

Bul rette qosylǵan qun salyǵy 16 protsent bolady. Al qosylǵan qun salyǵynyń shegi 40 mln teńge mólsherinde belgilenedi. 

Atap aıtqanda, QQS-tiń tómengi shegi 40 mln teńge bolsa, jylyna qosymsha 4-5 trln teńge salyq túsimderi keledi. Ulttyq qorǵa táýeldilik tómendep, bıýdjet ózin-ózi qamtamasyz etedi.