QKP joǵary eshelonynda óte sırek kadrlyq aýys-túıis boldy
ASTANA. KAZINFORM – Búgin Qytaı kommýnıstik partııasynyń (QKP) joǵary eshelonynda óte sırek kezdesetin kadrlyq aýys-túıistiń bolǵany týraly aqparat tarady.
QKP OK Birikken maıdan bóliminiń burynǵy basshysy Shı Taıfen QKP OK Uıymdastyrý bóliminiń basshysy bolyp taǵaıyndalsa, QKP OK Uıymdastyrý bóliminiń burynǵy basshysy Lı Gantsze endi QKP OK Birikken maıdan bólimin basqarady. Bul týraly Lianhe Zaobao basylymy habarlady.
QKP Ortalyq komıtetiniń eki negizgi fýnktsıonaldyq bóliminiń basshylarynyń ózara aýysýy óte sırek qubylys.
Aıta keterlik bir jaıt, Shı Taıfen men Lı Gantsze ekeýi de QKP OK Saıası bıýrosynyń múshesi jáne OK Hatshylyǵynyń hatshysy.
Basylymnyń jazýynsha, QKP OK Saıası bıýrosy 31 naýryz kúni QKP Bas hatshysy Sı Tszınpınniń tóraǵalyǵymen keńes ótkizgen. Keńeste kadrlyq aýys-túıis máselesi de qaralǵan.
Belgili bolǵandaı, keńeste QKP OK Uıymdastyrý bólimi men Birikken maıdan bóliminiń basshylaryn ózara aýystyrý týraly sheshim shyǵarylǵan. Aqparat kózderiniń bergen málimetine sáıkes, partııa ishinde ózara kadrlyq aýys-túıis burynnan bar tájirıbe bolǵanymen, osynshama joǵary deńgeıdegi jetekshilerdiń ornyn tikeleı aýystyrý óte sırek kezdesedi. Sondyqtan sarapshylardyń ózi buǵan jip taǵa almaı, ań-tań qalyp otyr.
Uıymdastyrý bólimi, Úgit-nasıhat bólimi jáne Birikken maıdan bólimi – QKP Ortalyq komıtetiniń úsh negizgi fýnktsıonaldyq qurylymy. Uıymdastyrý bólimi partııanyń uıymdyq jáne kadrlyq saıasatyn jolǵa qoıyp, joǵary laýazymdy sheneýnikterdiń jumysyn baǵalaýǵa, olardyń laýazymdyq qyzmetin retteýge jaýap beredi. Sondyqtan ol árqashan QKP júıesindegi eń yqpaldy fýnktsııalyq qurylym sanalady.
Birikken maıdan bólimi – QKP-nyń Birikken maıdan saıasatyna jaýap beretin qurylym. Onyń negizgi jumysy — partııa qatarynda emes yqpaldy tulǵalarmen, onyń ishinde Gonkong, Makao jáne Taıvan turǵyndarymen, dinı qaıratkerlermen, jeke kásipkerlermen baılanys ornatý, olardy ortaq maqsatqa jumyldyrý.
2018 jyly Qytaı Memlekettik keńesiniń Sheteldegi qytaılyqtar isi jónindegi basqarmasy, Ulttyq azshylyqtar isi jónindegi memlekettik komıssııa jáne Din isi jónindegi ulttyq basqarma OK Birikken maıdan bólimine biriktirildi. Sóıtip, bul bólimniń quzyreti men mártebesi aıtarlyqtaı artqan bolatyn.
Qytaı JI-men jabdyqtalǵan uzaq qashyqtyqqa ushatyn apparat shyǵarǵanyn jazǵan bolatynbyz.