KKM júkti ruqsat etilgen salmaqtan artyq tıegeni úshin salynatyn aıyppul kólemin 200 AEK-ten 1000 AEK-ke deıin kóbeıtýdi usynýda
ASTANA. 19 jeltoqsan. QazAqparat - QR Kólik jáne kommýnıkatsııa mınıstrligi júkti ruqsat etilgen salmaqtan artyq tıegeni úshin salynatyn aıyppul kólemin 200 aılyq eseptik kórsetkishten 1000 AEK-ke deıin kóbeıtýdi usynýda.
Bul týraly atalǵan vedomstvo taratqan aqparatta aıtylǵan.
«Kóliktik baqylaý komıteti baqylaýdy kúsheıtý maqsatynda Kólik máseleleri jónindegi zań jobasyna, júkti ruqsat etilgen salmaqtan artyq tıegeni úshin salynatyn aıyppul kólemin nysan túrine qaraı (JK, shaǵyn, orta, iri kásip nysany) 200 aılyq eseptik kórsetkishten 1000 AEK-ke deıin kóbeıtý, sonymen birge júkti avtokólikterge ruqsat etilgen salmaqtan artyq tıegeni úshin júk jóneltýshilerdi (karer ıelerin) ákimshilik jaýapkershilikke tartý týraly usynys engizdi», - delingen habarlamada.
Mınıstrliktiń atap ótýinshe, zań jobasy QR Parlamenti Májilisiniń qaraýynda.
Budan ózge, vedomstvo keler jyldan bastap otandyq tasymaldaýshylardyń shet memleketterdiń aýmaǵy arqyly ótýi úshin beriletin ruqsat qujattardy bólýdiń avtomattandyrylǵan júıesin engizýdi josparlaýda. Atalǵan júıe ruqsat qujattaryn ashyq ári tepe-teń bólýdi qamtamasyz etedi. Júıe atalǵan protseske adamnyń aralasýyn boldyrmaıdy jáne sybaılas jemqorlyqqa jol bermeıdi.
