KKM zańsyz jolaýshy tasymaldarymen kúresti kúsheıtýdi josparlap otyr
ASTANA. 16 sáýir. QazAqparat - Kólik jáne kommýnıkatsııa mınıstrligi avtovokzaldar men tasymaldaýshylarǵa arnalǵan qyzmet kórsetýdiń biryńǵaı standarttaryn ázirleýde.
Atalǵan vedomstvonyń málimetinshe, bul jóninde Kólik jáne kommýnıkatsııa vıtse-mınıstri Qaırat Ábsattarov avtotasymaldaýshylar men avtovokzaldar assotsıatsııalar ókilderiniń qatysýymen bolǵan májiliste málimdedi.
Q. Ábsattarovtyń aıtýynsha, avtomobıl tasymaldaýshylarynyń qyzmeti elimizde erekshe suranysqa ıe. Jyl saıyn ortasha eseppen avtobýstarmen 13 mlrd., al taksımen 3 mıllıardtan astam jolaýshylar tasymaldanady. Alaıda, avtovokzaldar men avtobeketterdiń damymaǵan ınfraqurylymy, kórsetiletin qyzmet sapasynyń nasharlyǵy, zańsyz tasymaldaý naryǵy úlesiniń úlkendigi jáne apattyq deńgeıiniń joǵarylyǵy osy salanyń damýyna, sondaı-aq jolaýshylarǵa qyzmet kórsetý sapasyna keri áserin tıgizip keledi.
Májilis barysynda, Kólik jáne kommýnıkatsııa mınıstrligi avtomobıl kóligindegi jolaýshylar tasymalyn damytý boıynsha is-sharalar keshenin belgilegenin málimdedi. Olar mynadaı problemalardy sheshýge baǵyttalǵan: dıspetcherlik jáne bılet úlestirý qyzmetteriniń avtomattandyrylýy, jyljymaly quram parkin jańartý, tasymaldaýshylardyń jaýapkershiligin arttyrý jáne zańsyz tasymaldar úlesin azaıtý. Sonymen qatar, kóliktik zańdarǵa ózgerister engizý týraly zań jobasy ázirlendi. Oǵan qosa, quramyna memlekettik organdardyń ókilderi men avtotasymaldaýshylardyń ózderi kiretin sarapshylyq keńes quryldy.
Tasymaldaýshylar kólik vedomstvosy qolǵa alyp jatqan is-sharalardy qoldap, tasymaldardy kóptegen zań buzýshylyqtarmen júzege asyratyn zańsyz tasymaldaýshylarmen kúresti kúsheıtýdi jáne jolaýshylardy qajetti barlyq qyzmettermen qamtamasyz ete almaıtyn kezdeısoq turaqtardy joıýdy ótindi.
