KKM men «QazAvtoTrans» AQ ókilderi Petropavl jáne Kókshetaýda AQ fılıaldarynyń ujymdarynda kóshpeli jınalystar ótkizdi
ASTANA. Qyrkúıektiń 2-si. QazAqparat. Qyrkúıektiń 2-de Qazaqstan Respýblıkasy Kólik jáne kommýnıkatsııa mınıstrligi «QazAvtoTrans» AQ basshylarymen birlesip Petropavl jáne Kókshetaý qalalarynda aktsıonerlik qoǵam ujymdarynda kóshpeli jınalystar ótkizdi,
dep habarlaıdy KKM baspasóz qyzmeti.
Bul jınalystardy uıymdastyrýǵa sebep - joǵaryda atalǵan fılıaldardaǵy mekemeniń qıyn qarjylyq jaǵdaıy boldy. Sonyń ishinde, Petropavl qalasyndaǵy AQ fılıalynda 2007 jyldan 2010 jylǵa deıingi aralyqta 7 mıllıon teńgeden astam somaǵa jalaqy boıynsha qaryz paıda boldy. Ústimizdegi jyldan bastap atalǵan qaryz tolyǵymen ótelgen. Biraq, salyq jáne ózge de tólemder boıynsha 41 mıllıon teńgeden astam qaryzdar bar.
«QazAvtoTrans» AQ basqarma tóraǵasy Ǵumar Raqymjanov búgingi tańda qoǵam mekemeni daǵdarys jaǵdaıynan shyǵarýdyń birqatar júıeli sharalaryn ótkizgenin atap ótti. Onyń ishinde qoǵamnyń ortalyq apparaty pen onyń fılıaldaryndaǵy qyzmetkerler sany 2-3 ese qysqartyldy. 2009 jylǵy qarasha aıynan bastap kezeńmen jalaqy boıynsha qaryz ótelýde. Sonymen qatar, Petropavl qalasynyń ákimdigimen AQ fılıalynyń óndiristik bazalaryn qalanyń kommýnaldyq menshigine ótkizý jóninde kelisimder júrgizilýde.
Búgingi kúni Petropavl jáne Kókshetaý qalalaryndaǵy qoǵam fılıaldary qyzmetkerleriniń jalaqysy boıynsha qaryz tolyǵymen ótelgen. Kezekte Pavlodar, Semeı, Astana jáne Soltústik Qazaqstan oblysynyń Sergeevka poselkesindegi fılıaldar boıynsha osyndaı jumysty atqarý kózdelýde.
Kólik jáne kommýnıkatsııa mınıstrliginiń ókili Baýyrjan Áýbákirov qoǵamnyń qarjylyq jaǵdaıy men budan bylaıǵy keleshegi kólik vedomstvosynyń turaqty baqylaýynda ekendigin atap ótti. Barlyq fılıaldar boıynsha jalaqy qaryzyn óteý týraly máselesi erekshe baqylaýda.
Atalǵan fılıaldar qyzmetkerleri qalyptasqan jaǵdaı men jaǵdaıdy túzeý boıynsha AQ basshylarynyń atqaryp jatqan sharalaryna túsinistikpen qaraıtyndaryn aıtty.
