KKM aǵymdaǵy jyly jańa 13 baǵdar ashýdy, áýe kemeleri parkin 14 ushaqpen jabdyqtaýdy kózdep otyr
ASTANA. 27 qańtar. QazAqparat - QR Kólik jáne kommýnıkatsııa mınıstrligimen Qazaqstandaǵy ushý qaýipsizdigin arttyrý boıynsha júıeli túrde jumystar atqarylýda,
dep habarlady atalmysh vedomostvonyń baspasóz qyzmetinen. Búginde Qazaqstanda áýe qozǵalysyna qyzmet kórsetý jáne ushýdy qamtamasyz etýshi radıotehnıkalyq jabdyqtaryn paıdalaný erejeleri iske qosylǵan. Sondaı-aq avıakompanııalardy turaqty ishki kommertsııalyq avıatasymaldarǵa qatystyrýdyń jańa Erejeleri bekitilip, áýejaılardy basqarý jónindegi biryńǵaı operator, Azamattyq avıatsııa halyqaralyq uıymynyń (IKAO) avıatsııalyq qaýipsizdik jónindegi oqytý ortalyǵy quryldy.
Azamattyq avıatsııa komıteti avıatsııalyq bilimi jáne osy saladaǵy tájirıbesi bar bilikti mamandarmen tolyǵymen jasaqtalǵan.
2013 jyldyń jeltoqsanynda IKAO ınstıtýtynyń ókilderimen Komıtet qyzmetkerlerin oqytý úderisi bastaldy. Búgingi kúni olar «Tekserýdi jáne sertıfıkattaýdy júrgizý ádistemesi», «Memlekettik ınspektorlarmen ushýdy jasaýdyń negizgi kýrstary» oqý kýrstarynan ótti. 2014 jyldyń qańtar-aqpan aılarynda Komıtet qyzmetkerleri «Ushýdy jasaýdyń memlekettik ınspektory», «Ushý jaramdyǵy boıynsha memlekettik ınspektor», «Ushý jaramdyǵynyń memlekettik ınspektory jáne t.b. úshin negizgi kýrs» kýrstaryna qatysady. Teorııalyq daıyndyqty ótken soń Komıtet qyzmetkerleri IKAO TYB sarapshylarynyń jetekshiligimen jumys ornynda synaqtan ótedi.
Odan basqa Mınıstrlikpen ázirlengen Qazaqstan Respýblıkasynyń Kólik ınfraqurylymyn damytý jóninde 2020 jylǵa deıingi Memlekettik baǵdarlamasy sheńberinde áýejaılar ınfraqurylymyn damytý boıynsha jumys jalǵasýda. Taldyqorǵan jáne Taraz qalalary áýejaılarynyń ushý-qoný jolaqtaryn jańǵyrtý, Kókshetaý áýejaıynyń qaıta jańartý jumystary aıaqtaldy.
Sonymen qatar 2013 jyly halyqaralyq áýe qatynasynyń sany ósti. Josparlanǵan 78 ornyna, búgin QR 79 halyqaralyq avıabaǵdar jumys jasaýda, sonyń ishinde byltyr iske qosylǵan 15 bar. Áýe kemeler parkin jańartýda 2013 jyly dúnıejúzilik óndirýshilerdiń 13 ushaǵy satyp alyndy.
2014 jyly Astana, Almaty jáne Aqtaý áýejaılarynda múmkindikteri shekteýli jolaýshylarǵa qyzmet kórsetý standarttaryn engizý josparlanýda. 13 jańa baǵdar ashý josparlanǵan, al áýe kemeler parki 2014 jyly 14 ushaqpen jabdyqtalady (4 magıstraldi jáne 10 aımaqtyq).
