KQK júk jóneltýshilerden munaı qabyldaýdy qaıta bastady - mınıstrlik
ASTANA. KAZINFORM – Kaspıı qubyr konsortsıýmy (KQK) júk jóneltýshilerden munaı qabyldaýdy jáne ony Novorossıısk teńiz termınaly arqyly tıeý operatsııalaryn qaıta bastady, dep habarlaıdy QR Energetıka mınıstrligi.
Qazirgi ýaqytta KQK-nyń eki aılaq qurylǵysynda SEAMAJESTY jáne MILOS tankerlerine munaı tıeý jumystary júrgizilip jatyr. Eki keme de «Teńizshevroıl» JShS óndirgen munaıdy qabyldaýda.
Munaı qabyldaýdyń qaıta jandanýy munaı óndirýshi kompanııalarǵa shıkizatty qubyr júıesine jetkizýdi jalǵastyrýǵa jáne teńiz termınaly arqyly eksporttyq operatsııalardy qaıta bastaýǵa múmkindik beredi.
– Teńiz termınalyndaǵy operatsııalar aǵymdaǵy jaǵdaıdy baǵalaý jáne qaýipsizdik talaptaryn saqtaý eskerile otyryp júrgizilip jatyr, – delingen mınıstrlik habarlamasynda.
QR Energetıka mınıstrliginiń málimetinshe, vedomstvo KQK basshylyǵymen, iri júk jóneltýshilermen jáne úderiske qatysýshy ózge de taraptarmen turaqty baılanysta jumys istep keledi.
Mınıstrlik jaǵdaıdy baqylaýdy jalǵastyryp, qazaqstandyq munaıdy odan ári tasymaldaýdy qamtamasyz etýge baǵyttalǵan is-qımyldardy úılestirýde.
Aıta keteıik, buǵan deıin Kaspıı qubyr konsortsıýmynyń teńiz termınalynda Qazaqstan munaıyn tıep jatqan eki tankerge ushqyshsyz ushý apparattarymen shabýyl jasalǵan bolatyn.
Sodan soń Qazaqstan KQK arqyly munaı tasymaldaǵan azamattyq kemelerge jasalǵan shabýyldy qatań aıyptady.
