KQK tolyq qýatynda jumys istep tur — Energetıka mınıstri

ASTANA. KAZINFORM — Qazir Kaspıı qubyr konsortsıýmy (KQK) tolyq qýatynda jumys istep tur. Bul týraly Energetıka mınıstri Erlan Aqkenjenov málim etti. 

— Qazirgi kezde KQK eki qurylǵymen (VPÝ) jumys istep tur. Jeksenbi kúni jóndeýden keıin № 3 qurylǵysyn iske qostyq. Kún raıyna baılanysty ony tez arada jóndeı almadyq. Qara teńizde qys merziminde qatty daýyldar boldy, tolqyndardyń bıiktigi 2,5 metrden asady, — dedi Erlan Aqkenjenov.

Mınıstr № 1 jáne № 3 qurylǵylary qazir turaqty jumys istep turǵanyn, al shabýyldan keıin № 2 qurylǵy jartylaı qalqymaly kúıde ekenin aıtty.

— Ol jartylaı sýǵa batqan kúıinde tur. Men buǵan deıin onyń qańqasy buzylǵanyn aıtqanmyn. Sondyqtan kún raıyna baılanysty ony qalpyna keltire almadyq, — dep túsindirdi ol.

Bul turǵyda Energetıka mınıstrligi Arab Ámirlikterinen eki qurylyǵyny jetkizýge tapsyrys bergen. Olardy jetkizý merzimi shamamen 30 kún. 

— Ári qaraı, olardy ornatý jáne isten shyqqandaryn bólshekteý jumystary júrgiziledi, ıaǵnı buǵan 40 kúndeı ýaqyt kerek. Jalpy alǵanda, eki jańa qurylǵyny ornatýǵa 70 kún ketedi. Osydan keıin KQK-da úsh qurylǵy tolyq kúshinde jumys istep turady, — dedi mınıstr.

Eske salsaq, byltyr qarasha aıynda Reseıdiń Novorossıısk mańyndaǵy Kaspıı qubyr konsortsıýmynyń (KQK) teńiz termınalyna ekıpajsyz qaıyqtarmen jasalǵan shabýyl saldarynan VPÝ-2 júk tıeý-qabyldaý qurylǵysy zaqymdandy. 

Jeltoqsan aıynda Energetıka mınıstrligi Kaspıı qubyr konsortsıýmy (KQK) ınfraqurylymyna jasalǵan drondyq shabýyldardan keıin Qashaǵan ken ornynan óndiriletin munaıdyń eksporttyq baǵyttaryn qaıta qaraýǵa kiristi.