KQK termınalyndaǵy oqys oqıǵa: Energetıka mınıstrligi munaı tasymalyna qatysty jaǵdaıdy túsindirdi

ASTANA. KAZINFORM — Energetıka mınıstrligi buqaralyq aqparat quraldarynda Qazaqstan KQK termınalyndaǵy oqys oqıǵa saldarynan «4 mln tonna munaıdan aıyryldy» degen aqparat jalǵan ekenin jáne bul tehnıkalyq kórsetkishterdi durys túsinbeýden týyndaǵanyn habarlady.

Mınıstrlik málimetinshe, KQK munaı qubyrynyń Qazaqstan bóliginiń jobalyq ótkizý qabileti, ıaǵnı júıeniń tehnıkalyq shegi – 72 mln tonna. 2025 jyly josparlanǵan tasymal – 57 mln tonna, al 11 aıdyń derekterin eseptegende shamamen 68 mln tonnaǵa jetken, ıaǵnı jospardyń 119,3 %-y. Osylaısha, 4 mln tonna aıyrmashylyq – bul qubyrdyń bos múmkindigi, ıaǵnı munaı joǵalǵan joq. Teńiz termınaldaǵy oqıǵa jyldyq josparǵa krıtıkalyq keri áser etpedi.

– Oqys oqıǵanyń óndiristik protsesterge naqty áserine keletin bolsaq, shamamen 480 myń tonna munaı óndirý ýaqytsha qysqartyldy. Bul – jóndeý kezinde qoımalar tolyp qalmaýy úshin qoldanylǵan tehnologııalyq turǵydan qajetti shara. Atalǵan kólem qaıtarymsyz joǵaltylǵan dep qarastyrylmaıdy jáne termınal shtattyq rejımde jumysyn qaıta bastaǵannan keıin qosymsha júkteme arqyly tolyqtaı óteledi. Qazirgi sátte túzetýlerdiń bıýdjetke áserin baǵalaý erte. Óıtkeni munaı kompanııalardyń aktıvinde saqtalyp tur jáne logıstıka qalpyna kelgennen keıin satylymǵa shyǵarylady, - delingen habarlamada.

Qazir munaı tıeý jumystary termınalda jumys istep turǵan VPÝ-1 (aılaq qurylǵysy) qurylǵysy arqyly jalǵasyp jatyr. Al VPÝ-3-tegi shlangtardy aýystyrý jumystary aıaqtalýǵa jaqyn (15 jeltoqsanda bitirý josparlanǵan. Qurylǵyny iske qosý tolyq ótkizý qabiletin qalpyna keltirýge múmkindik beredi.
Shekteýlerdi azaıtý maqsatynda mınıstrlik iri operatorlarmen birlesip munaıdy ártúrli baǵyttar arqyly tasymaldaý sharalaryn der kezinde qabyldady.

– KQK – Qazaqstannyń negizgi eksporttyq joly, oǵan tolyqqandy balama joq. Soǵan qaramastan, barlyq qosymsha marshrýttar paıdalanyldy. Atap aıtqanda, Qashaǵan ken ornynan óndirilgen munaıdy qosa alǵanda birqatar kólem tehnıkalyq qajettilik pen aktsıonerler arasyndaǵy kommertsııalyq kelisimderge sáıkes «Atasý-Alashańqaı» munaı qubyry arqyly shuǵyl túrde Qytaı Halyq Respýblıkasyna baǵyttaldy. Sondaı-aq, «Atyraý-Samara» júıesi arqyly tasymaldaý kólemi de arttyrylyp, temirjol kóliginiń múmkindikteri paıdalanylyp jatyr. Novorossıısk jáne Ýst-Lýga porttary arqyly qazaqstandyq munaıdy qabyldaý jáne tasymaldaý jumystary shekteýsiz, shtattyq rejımde júzege asyrylyp jatyr. Іri jobalarǵa qatysýshy operatorlardyń (TKO, NCOC, QKO) operatsııalyq qyzmetine eshqandaı qaýip tónip turǵan joq. Jumys aǵymdaǵy kelisimder aıasynda júrgizilip jatyr. Menshikti aýystyrý nemese aktsııalardy satyp alý boıynsha kelissózder júrgizilmeıdi. Jaǵdaı QR Energetıka mınıstrliginiń turaqty baqylaýynda, eksporttyq kelisimsharttardyń buzylý qaýpi joq, - dedi mınıstrlikten.

Eske sala keteıik, buǵan deıin KQK taǵy shabýylǵa ushyraǵanyn jazǵan bolatynbyz. Reseıdiń Novorossıısk mańyndaǵy Kaspıı qubyr konsortsıýmynyń (KQK) teńiz termınalyna ekıpajsyz qaıyqtarmen jasalǵan shabýyl saldarynan VPÝ-2 júk tıeý-qabyldaý qurylǵysy zaqymdandy. Oqıǵa 29 qarasha kúni Astana ýaqytymen 06:06-da boldy.

30 qarashada Kaspıı qubyr konsortsıýmyna jasalǵan shabýylǵa baılanysty Qazaqstan narazylyq bildirdi.

Energetıka mınıstrligi KQK-daǵy tótenshe jaǵdaıǵa qatysty túsinikteme berdi.

Qazaqstanda munaı ónimderine jańa aktsız mólsherlemeleri qabyldandy.

2040 jylǵa qaraı Qazaqstanda jylyna 10 mln tonna munaı óńdeıtin zaýyt ashylady.