KQK termınaly mańynda taǵy drondar baıqaldy - Energetıka mınıstrligi
ASTANA. KAZINFORM – 8 qyrkúıekte Kaspıı qubyr konsortsıýmynyń teńiz termınaly mańynda ushqyshsyz ushý apparattaryna qatysty oqıǵa tirkelip, munaı tıeý jumystary ýaqytsha toqtatyldy, dep habarlaıdy Energetıka mınıstrligi.
Vedomstvo málimetinshe, oqıǵaǵa baılanysty VPÝ-3 jáne VPÝ-2 aılaq qurylǵylarynda munaı tıeý operatsııalary ýaqytsha toqtatylǵan.
KQK-nyń júk tıeý júıeleri men tankerleriniń jaǵdaıyna qajetti tekserýler júrgizilgen.
– Qajetti tekserýlerden keıin KQK-nyń júk tıeý júıeleri men tankerlerinde munaı tıeý operatsııalaryn odan ári júrgizýge kedergi keltiretin aqaýlar anyqtalǵan joq. Qorshaǵan ortaǵa áser etý derekteri tirkelmedi. Osydan keıin munaı tıeý operatsııalary qaıta bastaldy. Qazirgi ýaqytta jumystar shtattyq rejımde júrgizilip jatyr, – dep habarlady Energetıka mınıstrligi.
Mınıstrlik qazaqstandyq munaı jóneltýshilerden shıkizat qabyldaýǵa eshqandaı shekteý engizilmegenin atap ótti.
Buǵan deıin Energetıka mınıstrligi Kaspıı qubyr konsortsıýmyna jasalǵan shabýyldardyń saldaryna baılanysty Qazaqstannyń 2026 jylǵa arnalǵan munaı óndirý jospary 98 mln tonnadan 96 mln tonnaǵa deıin tómendetilgenin habarlaǵan bolatyn.
KQK teńiz termınalyna ushqyshsyz ushý apparattarymen baılanysty buǵan deıingi oqıǵalar shilde aıynda tirkelgen. Sol kezde konsortsıým teńiz termınaly akvatorııasyndaǵy eki tankerge shabýyl jasalǵanyn málimdegen edi.
