KQK teńiz termınalynda dron shabýylynan keıin munaı tıeý ýaqytsha toqtatyldy
ASTANA. KAZINFORM – Kaspıı qubyr konsortsıýmy (KQK) teńiz termınaly aýdanynda bolǵan oqıǵaǵa baılanysty Qazaqstan Respýblıkasynyń Energetıka mınıstrligi málimdeme jasady.
Mınıstrliktiń habarlaýynsha, KQK usynǵan aqparatqa sáıkes, 30 shilde kúni Nissos Sifnos tankerine úshinshi aılaq arqyly munaı tıeý jumystary aıaqtalyp jatqan kezde tıeý manıfoldy aýdanynda ushqyshsyz ushý apparattarynyń shabýyly tirkelgen.
– UUA shabýyly qaýpine baılanysty KQK tarapynan munaı tıeý jumystary aldyn ala toqtatyldy, – delingen mınıstrlik habarlamasynda.
Sondaı-aq tıeýge josparlanǵan Marathi tankeri de KQK teńiz termınalynan 6-7 teńiz mıli qashyqtyqta ushqyshsyz ushý apparattarynyń shabýylyna ushyraǵan.
Mınıstrliktiń málimetinshe, qolda bar aqparatqa sáıkes, ekıpaj músheleri arasynda zardap shekkender joq jáne munaıdyń tógilýine jol berilmegen.
– Shabýyl saldarynan týyndaǵan órt KQK-nyń úsh býksıriniń kómegimen sóndirildi, – dep habarlady vedomstvo.
Aıta keteıik, buǵan deıin Kaspıı qubyr konsortsıýmynyń teńiz termınalynda Qazaqstan munaıyn tıep jatqan eki tankerge ushqyshsyz ushý apparattarymen shabýyl jasalǵan bolatyn.
Sodan soń Qazaqstan KQK arqyly munaı tasymaldaǵan azamattyq kemelerge jasalǵan shabýyldy qatań aıyptady.
27 shildede Kaspıı qubyr konsortsıýmy (KQK) júk jóneltýshilerden munaı qabyldaýdy jáne ony Novorossıısk teńiz termınaly arqyly tıeý operatsııalaryn qaıta bastaǵany málim boldy.
