KQK teńiz termınaly arqyly munaı jóneltý kóleminiń tómendegeni ras pa

ASTANA. KAZINFORM - Energetıka mınıstrligi jeltoqsan aıynda KQK teńiz termınaly arqyly munaı jóneltý kóleminiń ýaqytsha tómendegenin rastady.

Mınıstrliktiń baspasóz qyzmeti taratqan aqparatqa qaraǵanda, atalǵan jaǵdaı ushqyshsyz ushatyn apparattardyń shabýyldary saldarynan VPÝ-3 aılaq qurylǵysynyń qyzmetin májúrli toqtatýyna jáne Qara teńiz akvatorııasyndaǵy qolaısyz meteorologııalyq ahýalǵa (daýyldy qubylystar) baılanysty boldy. 

Obektıvti faktorlardyń salaǵa áserin barynsha azaıtý jáne munaı óndirýdiń toqtap qalýyna jol bermeý úshin vedomstvo eksporttyq aǵyndardy jedel túrde qaıta bólý jóninde tıisti sharalar qabyldady.

Munaı kóleminiń bir bóligi balamaly tasymaldaý baǵyttaryna qaıta baǵdarlandy. 

- Atap aıtqanda, Atyraý–Samara baǵyty boıynsha tasymaldaý kóleminiń óskeni jáne Qytaı Halyq Respýblıkasyna jetkizilimderdiń artqany tirkeldi. Qalǵan eksporttyq baǵyttar boıynsha tasymaldaý ortasha josparly kórsetkishter deńgeıinde saqtaldy. Jaǵdaı ýákiletti organnyń turaqty baqylaýynda, - delingen habarlamada.

Osyǵan deıin «QazMunaıGaz» UQ» AQ Kaspıı qubyr konsortsıýmynyń termınalyndaǵy tankermen bolǵan oqıǵaǵa qatysty habarlama taratqan bolatyn. 

Keıinirek Energetıka mınıstrligi KQK termınalyndaǵy tankerge shabýyl týraly pikir bildirdi.