KQK taǵy shabýylǵa ushyrady: júk tıeý-qabyldaý qurylǵysy zaqymdandy

ASTANA. KAZINFORM – Reseıdiń Novorossıısk mańyndaǵy Kaspıı qubyr konsortsıýmynyń (KQK) teńiz termınalyna ekıpajsyz qaıyqtarmen jasalǵan shabýyl saldarynan VPÝ-2 júk tıeý-qabyldaý qurylǵysy zaqymdandy. Bul týraly Kazinform tilshisi habarlaıdy.

Oqıǵa 29 qarasha kúni Astana ýaqytymen 06:06-da boldy. Novorossıısk teńiz porty kapıtanynyń tapsyrmasymen barlyq júkteý operatsııalary toqtatylyp, tankerler termınal akvatorııasynan shyǵarylǵan. KQK men merdiger kompanııa qyzmetkerleri arasynda zardap shekkender joq.

«Jarylys kezinde avarııalyq qorǵaý júıesi tıisti munaı qubyrlaryn avtomatty túrde jaýyp, qaýipsizdikti qamtamasyz etti. Aldyn ala málimet boıynsha, munaı Qara teńizge tógilmegen», – dep habarlady konsortsıýmnyń baspasóz qyzmeti.

Qazir mamandar teńiz sýynan synama alyp, ekologııalyq monıtorıng júrgizýde. Barlyq jumystar munaı tógindilerin oqshaýlaý josparyna sáıkes atqarylyp jatyr.

KQK ókilderi VPÝ-2 qurylǵysyn ári qaraı paıdalanýǵa bolmaıtynyn aıtty. Munaı tasymaldaý tek ekıpajsyz qaıyqtar men drondar qaýpi tolyq joıylǵannan keıin jalǵasady.

Bul konsortsıým nysandaryna jasalǵan bıylǵy úshinshi shabýyl. Buǵan deıin «Kropotkınskaıa» munaı aıdaý stantsııasy zaqymdanǵan bolatyn.

Eske salaıyq, 25 qarashada Novorossıısk mańyndaǵy KQK teńiz termınalynyń keńsesi de shabýylǵa ushyraǵan edi.