KQK-nyń zaqymdanýy: AQSh Ýkraınaǵa resmı eskertý jasady
ASTANA. KAZINFORM — AQSh prezıdentiniń ákimshiligi Kaspıı qubyr konsortsıýmynyń munaı ınfraqurylymyna jasalǵan soqqylardan keıin Ýkraınaǵa dıplomatııalyq eskertý joldady. Bul shabýyldar Qazaqstan munaıyn eksporttaýǵa qatysty amerıkalyq ekonomıkalyq múddelerge áser etti, dep habarlaıdy CNN.
Bul týraly Ýkraınanyń AQSh-taǵy elshisi Olga Stefanıshına brıfıngte málimdedi. Onyń aıtýynsha, Ýkraına jaǵy AQSh Memlekettik departamentinen resmı dıplomatııalyq habarlama aldy.
— Ýkraınanyń Novorossııskige shabýyldary Qazaqstan arqyly júzege asyrylyp jatqan amerıkalyq ınvestıtsııalarǵa áser etkenin estidik. Memlekettik departament bizge amerıkalyq múddelerge qarsy áreketter men shabýyldardan bas tartý jóninde ýájin aıtty, — dedi ol.
Olga Stefanıshına kezdesý barysynda Qazaqstandaǵy AQSh-tyń jobalaryna qatysty másele qaralǵanyn atap ótti.
Aıta keteıik, AQSh-tyń energetıkalyq Chevron kompanııasy 15% úlespen konsortsıýmnyń aktsıoneri quramynda.
— Bul jaǵdaıda amerıkalyq ekonomıkalyq múddelerge qaýip tóngeni atap ótildi. Sondyqtan ony biz nazarǵa aldyq, — dedi dıplomat.
Jalpy, Kaspıı qubyr konsortsıýmy jelisi arqyly Qazaqstannyń iri ken oryndarynan munaı eksporttalady.
Eske salsaq, byltyr qarasha aıynda Reseıdiń Novorossıısk mańyndaǵy Kaspıı qubyr konsortsıýmynyń (KQK) teńiz termınalyna ekıpajsyz qaıyqtarmen jasalǵan shabýyl saldarynan VPÝ-2 júk tıeý-qabyldaý qurylǵysy zaqymdandy.
Jeltoqsan aıynda Energetıka mınıstrligi Kaspıı qubyr konsortsıýmy (KQK) ınfraqurylymyna jasalǵan drondyq shabýyldardan keıin Qashaǵan ken ornynan óndiriletin munaıdyń eksporttyq baǵyttaryn qaıta qaraýǵa kiristi.
Arýjan Jánádil