KQK munaı qubyry josparly toqtatýdan soń iske qosyldy
ASTANA. QazAqparat - «Teńiz-Novorossıısk» magıstraldyq munaı qubyryn (MMQ) josparly túrde 56 saǵatqa toqtatý sheńberindegi jumystar aıaqtalǵannan soń qubyr arqyly munaı aıdaý isi qalpyna keltirildi, dep habarlaıdy Kaspıı qubyr kontsortsıýmynyń baspasóz qyzmeti.
Munaı tasymaldaý júıesine tehnıkalyq qyzmet kórsetý jáne Keńeıtý jobasy aıasynda qurylysy salynǵan jańa obektilerdi qosý jumystary júrgizildi. Bul is-sharalar magıstraldyq munaı qubyrynyń barlyq nysandarynda, onyń ishinde munaı aıdaý stantsııalary (MAS) men Teńiz termınalynda júrgizildi.
Qazaqstan Respýblıkasynda jańadan salynǵan A-MAS-3A stantsııasyn magıstraldyq munaı qubyryna qosý jumystary oryndaldy. Onyń aldynda MAS quramyndaǵy barlyq qosalqy obektiler qaýipsizdik jónindegi tekserýden sátti ótkizildi.
«Atyraý» MAS-ta ControlNet jelilik basqarý júıesiniń koaksıaldyq segmentterin keshendi qaıta qurý júrgizildi. Bul júıe KQK-da 2001 jyldan beri qoldanylýda, ol MAS pen KQK Bas basqarý ortalyǵy (BBO) arasynda negizgi jáne qosalqy tehnologııalyq jabdyqtardan aqparat jáne basqarý komandalaryn kepildi túrde jetkizýge arnalǵan.
ControlNet jelisiniń apparattyq jáne baǵdarlamalyq qamtýyna júrgizilgen qaıta qurý MAS-tardy basqarýdyń senimdiligin arttyrýdy jáne búkil qubyr júıesin paıdalaný qaýipsizdiginiń deńgeıin kóterýdi múmkin etedi. 
KQK munaı tasymaldaý júıesin keńeıtý aıasynda iske qosylǵan jańa MAS-tardyń barlyq ótkizý toraptarynda qubyrishilik tazartqysh jáne dıagnostıkalyq qurylǵylardy avtomatty túrde ótkizý jumysynyń logıkasy testileýden ótkizildi.
Jyldyq baǵdarlamany oryndaý sheńberinde QR «Teńiz» jáne «Atyraý» MAS-tarynda, RF «Astrahanskaıa» jáne «Komsomolskaıa» MAS-tarynda jalpy sany 5 sharly kran aýystyryldy.
