KQK-men munaı tasymaldaý tarıfteri ózgere me: QR Energetıka mınıstrliginiń jaýaby
ASTANA. KAZINFORM – QR Energetıka mınıstri Erlan Aqkenjenov Kaspıı qubyr konsortsıýmy (KQK) tarıfteri jáne Qazaqstan munaıyn tasymaldaýdy ártaraptandyrý boıynsha málimdeme jasady.
Onyń sózinshe, bul máseleler V Eýrazııalyq ekonomıkalyq forým alańdarynda talqylanǵan.
– KQK tarıfteri taqyryby qarastyryldy. Biraq aktsıonerler arasynda ortaq kelisim kerek. Álbette, biz shıkizat eksporttaýshy el retinde qazirgi tarıfterdi saqtap qalǵymyz keledi. Degenmen, ony aktsıonerler otyrysynda qarastyramyz, – dedi mınıstr forým kýlýarynda.
Sonymen qatar, ol Qazaqstan munaıynyń negizgi kólemin halyqaralyq naryqqa tasymaldaýda KQK-ǵa balama dál qazir joq ekenin atap ótti.
– Bul qubyr jelisine balama ázirge joq. Ol arqyly Qazaqstannyń 60-70 mln tonna munaıy eksporttalady. Mundaı kólemdi qamtı alatyn basqa qubyr jelisi joq. Sondyqtan qazir basqa qubyrlar jóninde aıtyp júrsek, onyń bári – qosymsha marshrýttar. Biz kez-kelgen qosymsha baǵytty qarastyryp jatyrmyz, – dedi Erlan Aqkenjenov.
Sondaı-aq, ol elimiz Qazaqstan – Qytaı qubyr jelisin, Aqtaý – Mahachkala marshrýtyn qoldanatynyn jáne tasymaldyń bir bóligin Kaspıı teńizi arqyly júzege asyratynyn málimdedi.
Odan bólek, ekonomıkalyq turǵyda tıimdi bolsa, Qazaqstan Baký – Sýpsa marshrýty arqyly tasymaldaýdy qosymsha nusqa retinde qarastyrýǵa daıyn ekenin jetkizdi.
Áıtse de, Ázerbaıjan tarapymen resmı kelissózder ázirge júrgizilmegen.
Aıta keteıik, buǵan deıin KQK arqyly munaı turaqty eksporttalyp jatqanyn jazǵanbyz.
