KQK qaýipsizdigi boıynsha AQSh Ýkraınaǵa yqpal etýi kerek — Aıdos Sarym

ASTANA. KAZINFORM — Májilis depýtaty Aıdos Sarym Kaspıı qubyr konsortsıýmy (KQK) termınalyndaǵy tankerge drondarmen jasalǵan shabýylǵa qatysty pikir aıtty.

Onyń sózine qaraǵanda, Qazaqstan munaıynyń eksportyna kedergi keltirmes úshin AQSh pen ózge de seriktester Ýkraınaǵa yqpal etýi kerek.

— Sol konsortsıýmnyń iri aktsıoneriniń biri — Chevron. Qazirgi kezde Ýkraına AQSh-tyń jáne Eýropanyń qoldaýyna táýeldi ekenin bilemiz. Osyny eskersek, Chevron óte belsendi kompanııa jáne onyń múmkindikteri de joǵary. Sondyqtan Chevron-nyń múmkindigin paıdalaný kerek, ıaǵnı óz úkimetteri arqyly Ýkraınamen baılanysqa shyǵyp, Kaspıı qubyr konsortsıýmynyń mekemeleri men múlkine shabýyl jasamaýdy aıtý kerek, — dedi A. Sarym Parlament Májilisinde tilshiler suraǵyna jaýap bere otyryp. 

Eske salsaq, jaqynda QazMunaıGaz KQK termınalyndaǵy tankerge jasalǵan shabýylǵa qatysty pikir bildirgen bolatyn. 

Qazaqstan Respýblıkasy Energetıka mınıstrligi 2026 jylǵy 13 qańtarda Qara teńiz akvatorııasynda, Kaspıı qubyr konsortsıýmy teńiz termınaly mańynda Qazaqstannyń eksporttyq munaıyn tasymaldaýǵa qatysqan eki kemede tirkelgen keleńsiz oqıǵalar týraly aqparatty resmı túrde rastady.