KQK-ge shabýyldan Qazaqstan 500 mln dollar kiristen qaǵylýy múmkin - sarapshy

ASTANA. KAZINFORM – Kaspıı qubyr konsortsıýmyna dronmen shabýyl saldarynan Qazaqstan 500 mln dollarǵa deıin kiristen qaǵylýy múmkin. Mundaı derekti munaı-gaz salasynyń sarapshysy Asylbek Jákıev usynyp otyr.

- Bul - elimiz úshin qaýipti, qıyn jaǵdaı. Óıtkeni Qazaqstan munaıy eksportynyń 80 paıyzy Kaspıı qubyr konsortsıýmy arqyly syrtqy naryqqa shyǵarylady. Bizdiń esebimiz boıynsha, qarjy jaǵynan 250 mln dollardan 500 mln dollarǵa deıin elimizge shyǵyn keledi. Qazirgi ýaqytta qubyr operatorlary óndiris josparyn qaıta qarastyryp jatqany belgili. Boljam boıynsha Qazaqstan munaıynyń eksport kólemi 30 paıyzǵa qysqarýy yqtımal, - dedi ol agenttik tilshisine.

Osy oraıda, sarapshy Memleket basshysy Qasym-Jomart Toqaev 2 jyl buryn Atyraýǵa saparynda jer astynda munaı saqtaıtyn rezervýarlar salý tapsyrmasyn bergenin eske alady. Onyń atap ótýinshe, búginde elimizde mundaı iri rezervýar joq. Al bolǵan jaǵdaıda túrli tótenshe oqıǵalar kezinde óndirilgen munaıdy jer astyna qaıta aıdap saqtap qoıýǵa bolar edi.

Sondaı-aq sarapshy bul oqıǵaǵa baılanysty Qazaqstan Úkimetiniń qatań ustanymy bolýy tıistigin aıtady.

- Bul máselege oraı Syrtqy ister mınıstrligi pikir bildirdi. Biraq, menińshe, Qazaqstan Úkimetiniń qatań ustanymy bolýy tıis. Ýkraına basshylyǵyna shyǵyp, bolashaqta mundaı oqıǵalardyń qaıtalanbaýy kerektigin qatań túrde eskertýi qajet, - dedi Asylbek Jákıev.

Esterińizge sala ketsek, 17 aqpanda Kaspıı qubyr konsortsıýmynyń «Kropotkınskaıa» munaı aıdaý stansasyna dronmen shabýyl jasaldy. 

Osydan keıin elimizdiń Energetıka mınıstrligi Qazaqstan munaıy úshin KQK tarapynan esh shekteý joqtyǵyn, munaıdy qabyldaý shtattyq rejımde júzege asyrylyp jatqanyn málimdegen edi.

Alaıda, reseılik «Transneft» kompanııasynyń resmı saıtynda jarııalanǵan aqparatta Qazaqstan tarapynan munaı aıdaý kóleminiń qysqarýy múmkin ekendigi aıtylady. 

18 aqpan kúni Reseı Tergeý komıteti Kaspıı qubyr konsortsıýmynyń azamattyq nysandaryna jasalǵan shabýyl faktisi boıynsha qylmystyq is qozǵaǵany belgili boldy.