KQK dron shabýylynan keıin munaı aıdaý stantsııasyn qalpyna keltirip jatyr

ASTANA. KAZINFORM – Qazirgi ýaqytta Kaspıı qubyr konsortsıýmy (KQK) «Kropotkınskaıa» munaı aıdaý stantsııasynda (MAS) qalpyna keltirý jumystaryn júrgizip jatyr. Bul týraly Kazinform agenttigine kompanııanyń baspasóz qyzmeti habarlady.

Reseı Qorǵanys mınıstrliginiń málimetinshe, 2025 jylǵy 24 naýryzda túngi saǵat 2.00 shamasynda áýe shabýylyna qarsy qorǵanys júıesi Krasnodar ólkesindegi «Kropotkınskaıa» stantsııasyna baǵyttalǵan dron shabýylyn toıtarǵan. Alaıda, atyp túsirilgen dronnyń synyqtary «Kavkazskaıa» temirjol stantsııasy mańyna qulaǵan.

- 2025 jylǵy 17 aqpanda «Kropotkınskaıa» stantsııasyna jeti dron arqyly jappaı shabýyl jasalǵan bolatyn. Olar jarylǵysh zattarmen qatar metall synyqtarymen de jabdyqtalǵan, – delingen KQK habarlamasynda.

Kompanııanyń baspasóz qyzmeti 2025 jylǵy 19 naýryzda birneshe dronnyń «Kavkazskaıa» munaı aıdaý stantsııasyna da shabýyl jasaǵanyn rastady. Bul stantsııa arqyly KQK qubyr júıesine munaı jetkizilip, keıin teńiz termınalyna jóneltiletin.

«Kavkazskaıa» stantsııasy arqyly aı saıyn keminde 130 myń tonna munaı tasymaldanady. 2024 jyly bul kórsetkish 1,51 mln tonnany qurady.

KQK málimetinshe, «Kropotkınskaıa» stantsııasy toqtaǵannan keıin jyldyq tasymal kólemi qysqarǵan. Al «Kavkazskaıa» stantsııasy tolyq joıylǵandyqtan, onyń qyzmeti jaqyn arada qalpyna kelmeıdi.

Qazirgi ýaqytta KQK «Kropotkınskaıa» stantsııasynda jóndeý jumystaryn jalǵastyrýda.

Buǵan deıin Qazaqstannyń Energetıka mınıstrligi KTK-ǵa jasalǵan shabýyldarǵa qatysty pikir bildirgen edi.