QKHP óz kandıdatyn qoldaýǵa arnalǵan avtosherý ótkizdi

NUR-SULTAN. QazAqparat - 14 mamyr kúni elordada Qazaqstan Kommýnıstik Halyq partııasy Astana qalalyq komıtetiniń saılaýaldy shtaby partııa atynan kezekten tys prezıdent saılaýyna túsip jatqan kandıdatty qoldaý maqsatynda avtosherý ótkizdi. Bul týraly partııanyń baspasóz qyzmetine silteme jasap QazAqparat habarlaıdy.

Kólik kerýeni D. Qonaev, Máńgilik el kósheleriniń qıylysynan jolǵa shyqty. Qala kóshelerimen qyzyl baıraqty jelbiretip júıtkigen temir tulparlar birden jurttyń qyzyǵýshylyǵy men tańdanysyn týǵyzdy. Óıtkeni ár kólikten kommýnısterdiń nyshany men mundalap turdy.

«Avtosherýge kandıdattyń úgit-nasıhat jumysyna serpin berý, turǵyndardy partııanyń tynys-tirshiligimen tanystyrý mindeti júkteldi», - dedi QKHP Astana qalalyq saılaýaldy shtabynyń jetekshisi Nurdáýlet Orazhanov.

Kólik kerýeni alǵashqy aıaldama retinde Mınıstrlikter úıiniń aldyna toqtady. Osylaısha memlekettik qyzmetkerlerdiń nazaryn ózine aýdardy.

Úgitshiler kólikte otyryp, dybys zoraıtqyshpen «QKHP úshin daýys ber!», «Adal eńbek qoǵam múddesi úshin!» dep urandady. Sonymen qatar olar saılaýaldy baǵdarlama jazylǵan býkletterdi taratty.

Avtosherýge qatysýshylar sol jaǵalaýda ornalasqan Halyqqa qyzmet kórsetý ortalyǵy men «Astana-moll» saýda ortalyǵyna, «Artem», «Shapaǵat», bazarlaryna aıaldady. Bul jerlerde de kommýnıster halyqpen kezdesip, olardy saılaýǵa qatysýǵa jáne QKHP kandıdatyna daýys berýge shaqyrdy.

Illıýstratsııalyq foto