QK ardagerleri men aýǵandyq-jaýyngerler Jańaózende bolǵan oqıǵaǵa jáne jekelegen adamdardyń Úkimettiń otstavkaǵa ketsin degen talabyna alańdaýshylyq bildirdi

Jańa jyl qarsańynda ótkizilgen baspasóz máslıhatynda «Qarýly Kúshterdiń ardagerleri» respýblıkalyq qoǵamdyq birlestiginiń tóraǵasy general-leıtenant Baqytjan Ertaev: «Jekelegen adamdardyń búkil ardagerlerdiń atynan buqaralyq aqparat quraldaryna osyndaı ózderiniń bastamasymen shyqqanyna qatty ókinemiz. Barlyq máseleni órkenıetti túrde sheshý qajet. Memlekettegi tártip pen turaqtylyq - búgingi jáne erteńgi jetistikterimizdiń kepili bolmaq», - dep atap ótti.

Sonymen qatar ol Elbasy N.Nazarbaevtyń Jańaózen turǵyndarymen bolǵan kezdesýde aıtqan: «Qazaqstan qoǵamynyń basty qundylyǵy - táýelsizdik, beıbitshilik jáne tynyshtyq», - degen sózin keltirdi. Ardagerdiń pikirinshe, elimizdiń qol jetken tabystaryn saqtap qalyp, ony damyta túsý úshin qazirgi tańda qazaqstandyqtarǵa birlik pen ózara túsinistik aýadaı qajet.

Sondaı-aq, ardagerler memleket basshysynyń tapsyrmasyna sáıkes Úkimet Jańaózen, Shetpe, Aqtaý qalalarynda tártipti qalpyna keltirý úshin tótenshe jaǵdaılar sharasyn tez arada qolǵa alǵanyn atap ótti.

Úkimet Jańaózendi qalpyna keltirý úshin barlyq qajetti jaǵdaıdy jasaýda. Qaladaǵy áleýmettik-ekonomıkalyq, gýmanıtarlyq máseleler jedel túrde sheshilýde. Osynyń bári jappaı tártipsizdik kezinde zardap shekken azamattardyń taǵdyryna el basshylyǵynyń beı-jaı qaraı almaıtynyn kórsetedi.

Qarýly Kúshter men aýǵan soǵysynyń ardagerleri atynan qoǵamdyq uıymdardyń jetekshileri otandastarymyzdy qandaı da bir arandatýǵa jol bermeýge, syn saǵatta danalyq tanytyp, tynyshtyq saqtaýǵa shaqyrdy.