Qyzmettik etıka: memlekettik qyzmetshi neni bilýi tıis

ASTANA. KAZINFORM – Memleket pen qoǵam arasyndaǵy ashyqtyq pen turaqty ózara is-qımyl jaǵdaıynda qyzmettik etıka máseleleri erekshe mańyzǵa ıe bolyp otyr. Azamattardyń memlekettik organdarǵa degen senim deńgeıi, kórsetiletin qyzmetterdiń sapasy jáne tutastaı alǵanda memlekettik qyzmettiń ımıdji memlekettik qyzmetshiniń minez-qulqyna tikeleı baılanysty. Osy rette memlekettik qyzmetshi qyzmet barysynda jáne jumystan tys ýaqytta neni bilýi kerek ekenin jazǵan edik. 

Qazaqstan Respýblıkasynda qyzmettik etıka normalary Qazaqstan Respýblıkasy Prezıdentiniń 2015 jylǵy 29 jeltoqsandaǵy № 153 Jarlyǵymen bekitilgen Qazaqstan Respýblıkasy memlekettik qyzmetshileriniń Ádep kodeksinde aıqyndalǵan.

Qyzmettik etıkanyń negizgi qaǵıdattary

Ádep kodeksinde memlekettik qyzmetshi qyzmettik mindetterin atqarý kezinde mynalarǵa mindetti ekeni belgilengen:

• zańdylyqty, ádildik pen beıtaraptyq qaǵıdattaryn saqtaýǵa;

• azamattardyń quqyqtary men zańdy múddelerine qurmetpen qaraýǵa;

• memlekettik qyzmetke degen senimge nuqsan keltiretin áreketterge jol bermeýge;

• azamattarmen qarym-qatynas kezinde sypaıy, ádepti jáne taktili bolýǵa.

Qyzmetten tys minez-qulyq jáne bedel

Ádep kodeksi tek qyzmettik ýaqytqa ǵana emes qoldanylady. Memlekettik qyzmetshi óziniń qyzmetten tys ýaqyttaǵy minez-qulqy, onyń ishinde áleýmettik jelilerdegi belsendiligi de memlekettik qyzmettiń bedeline áser etetinin este saqtaýǵa mindetti.

Kodekste memlekettik qyzmetshiler:

• qoǵamdyq aıyptaýǵa ákep soǵýy múmkin áreketterden tartynýǵa;

• dáıeksiz aqparattyń taralýyna jol bermeýge;

• jalpyǵa ortaq moral men iskerlik etıka normalaryn saqtaýǵa tıis ekendigi kórsetilgen.

Etıka normalaryn buzǵany úshin jaýapkershilik

Ádep kodeksi talaptaryn buzý tártiptik jaýapkershilikke ákep soǵýy múmkin. Sonymen qatar, ádep jónindegi ýákil ınstıtýtynyń negizgi mindeti – buzýshylyqtardyń aldyn alý, adal jáne qurmetti minez-qulyq mádenıetin qalyptastyrý bolyp tabylady, jazalaý sharalary emes.

Qorytyndylaı kele, qyzmettik etıka – bul formaldylyq emes, memlekettik qyzmettiń sapasyn arttyrýdyń mańyzdy quraly ekenin atap ótken jón. Azamattarǵa sypaıy qarym-qatynas jasaý, iskerlik qatynas normalaryn saqtaý jáne árbir memlekettik qyzmetshiniń jeke jaýapkershiligi qoǵamnyń memleketke degen senimin nyǵaıtýǵa jáne memlekettik qyzmettiń oń ımıdjin qalyptastyrýǵa yqpal etedi.

Eske sala keteıik, buǵan deıin memlekettik qyzmetshiler JI-di kúndelikti jumysyna engizip jatqanyn jazǵan edik.