Qyzmettik derekterdiń taralýyna kóbine adam faktory sebep bolady
ASTANA. KAZINFORM — Qazaqstannyń avıatsııalyq ákimshiliginde ótken semınarda qyzmettik aqparattyń taralýyna kóbine áleýmettik ınjenerııa men adam faktory sebep bolatyny aıtyldy. Mamandar qyzmetkerlerdi kıberqaýipterden saqtaný jáne derbes derekterdi qorǵaý talaptaryn qatań saqtaýǵa shaqyrdy.
Qazaqstannyń avıatsııalyq ákimshiliginde kıberqaýipsizdik jáne jasandy ıntellektini qoldaný máselelerine arnalǵan semınar ótti. Іs-sharaǵa Qazaqstannyń avıatsııalyq ákimshiliginiń Bas atqarýshy dırektory Maıkl Denıel, aǵa keńesshi Erjan Jaqypov jáne QR Jasandy ıntellekt jáne tsıfrlyq damý mınıstrliginiń Aqparattyq qaýipsizdik komıtetiniń ókili Aıdynhan Qaıratov qatysty.
Іs-sharany ashqan Maıkl Denıel uıym qyzmetinde kıberqaýipsizdikti qamtamasyz etýdiń jáne jasandy ıntellekt tehnologııalaryn saýatty qoldanýdyń mańyzdylyǵyn atap ótti.
Semınarǵa departament dırektorlary oflaın qatysyp, al qurylymdyq bólimshelerdiń qyzmetkerleri is-sharaǵa onlaın formatta qosyldy.
A. Qaıratov qatysýshylarǵa tsıfrlyq zańnama, uıymdardyń ishki qaǵıdalary, qyzmetkerlerdi jyl saıyn oqytý, tsıfrlyq obektilerge aýdıt júrgizý jáne asa mańyzdy obektilerdi baqylaý máseleleri boıynsha aqparat berdi. Kezdesý barysynda qazirgi zamanǵy kıberqaýipter, qyzmettik aqparat pen derbes derekterdi qorǵaý, tsıfrlyq servısterdi qyzmettik maqsattarda paıdalanýǵa qoıylatyn talaptar, sondaı-aq jasandy ıntellektini jumys barysynda qoldanýdyń múmkindikteri men táýekelderi qarastyryldy.
Qatysýshylar mamanǵa halyqaralyq uıymdarmen ózara is-qımyl jasaý kezinde beınekonferentsııa baılanysynyń bulttyq servısterin paıdalaný, qyzmetkerlerdiń sheteldik oqý ortalyqtarynyń platformalarynda qashyqtan bilim alýy, sondaı-aq qyzmettik qujattamany korporatıvtik jáne syrtqy bulttyq servısterde saqtaý máseleleri boıynsha suraqtar qoıdy.
Semınar qorytyndysynda aqparattyń taralyp ketý jaǵdaılarynyń edáýir bóligi áleýmettik ınjenerııa ádisterimen jáne adamı faktorǵa baılanysty bolatyny atap ótilip, barlyq qyzmetkerlerdiń kıbergıgıena qaǵıdalaryn saqtaýynyń mańyzdylyǵy basa aıtyldy. Sonymen qatar qyzmetkerlerdiń aqparattyq qaýipsizdik salasyndaǵy habardarlyǵyn arttyrý maqsatynda osyndaı semınarlardy turaqty túrde ótkizý jóninde usynystar aıtyldy.
