Qyzmettik avtobýstarǵa aıaldamalarǵa toqtap, adamdy túsirip ketýge bola ma

ÓSKEMEN. KAZINFORM – Kazinform tilshisi «Zań boıynsha qyzmettik avtobýstarǵa aıaldamalarǵa toqtap, adamdy túsirip ketýge bola ma?» degen suraqtyń jaýabyn bilip kórdi.

Óskemende qala shetindegi óndiristik kásiporyndarda jumys isteıtinder kóp. Olar úshin kompanııa arnaıylap avtobýs tasymalyn uıymdastyrǵan.

- Sondaı qyzmettik avtobýstardyń aıaldamalarǵa toqtaıtynyn jıi kórip qalamyn. Bul qanshalyqty zańdy? Ózim jeke kólikpen júrgende aıaldamalarǵa toqtamaımyn. Sebebi bir ret tártip saqshylary aıyppul salyp tastaǵan. Sonda qyzmettik avtobýstarǵa aıaldamalarǵa toqtaýǵa bola ma? - dep surady Erkin Tatıev.

Bul saýaldyń jaýabyn bilý úshin qalalyq Polıtsııa basqarmasyna habarlastyq.

- Jol qozǵalysy erejelerinde osy týraly naqty jazylǵan. 12-taraýdyń 87-tarmaǵyna sáıkes, avtokólikterdiń jáne marshrýttyq kólik quraldarynyń aıaldamalarǵa jáne olardan 15 metrge jaqyn jerde toqtaýyna tyıym salynady. Avtobýs aıaldamalarynda toqtaýǵa jolaýshylardy tasymaldaýǵa arnalǵan jáne belgilengen aıaldama pýnktteri bar, bekitilgen marshrýt boıynsha júretin avtobýstarǵa, tramvaılarǵa jáne taksıge ǵana ruqsat etiledi, - dep jaýap berdi basqarma bastyǵynyń orynbasary Talǵat Qamzın.

Eske salsaq, osyǵan deıin kólik júrgizýshileri aınalma jolǵa kirgende zań boıynsha qaı jaq burylys shamyn jaqqany durys bolatyndyǵy jaıly jazǵanbyz.