Qyzmetten ketemin degen qorqynysh bolǵan joq – Aıdarbek Saparov Úkimettegi aýys-túıis týraly

ASTANA. KAZINFORM – Aýyl sharýashylyǵy mınıstri Aıdarbek Saparov qaıta jasaqtalǵan Úkimet quramynda qalaı jumys isteıtini týraly pikir bildirdi.

«Búgin keńeıtilgen otyrystan keıin, Prezıdent naqty tapsyrmalar bergennen keıin Aýyl sharýashylyǵy mınıstrliginde jańa tásilder qolǵa alynatyn shyǵar. Men tek óz mınıstrligime ǵana jaýap beremin», - dedi mınıstr Úkimettiń keńeıtilgen otyrysy aldynda BAQ ókilderiniń suraǵyna oraı.

«Jańa Premer-Mınıstr talapshyl dep jatyr. Ol talaptarǵa saı kelýge daıynsyz ba?» - dep surady jýrnalıst.

«Árıne, Premerdi árqashan tyńdaý kerek, biz Úkimet múshesimiz ǵoı. Birge jumys isteımiz, birge jyljımyz», - dedi Aıdarbek Saparov.

«Oryntaǵyńyzdan aıyrylyp qalam dep qoryqtyńyz ba?» - degen suraqqa mınıstr: «Eshqandaı qorqynysh bolǵan joq. Árdaıym senimdi jumys isteý kerek. Biz – áskermiz, qaıda jumsasa, sonda baramyz», - dedi vedomstvo basshysy.